Hindistanın Azərbaycandakı Səfirliyi Hindi Pakhwada münasibətilə xüsusi proqram təşkil edib. Tədbirdə Azərbaycandan hind dili həvəskarları, o cümlədən hindi dili üzrə professor və tələbələr, aparıcı media qurumlarının nümayəndələri, Azərbaycan vətəndaşları, eləcə də Hindistan diasporu assosiasiyalarının əsas nümayəndələri iştirak ediblər.


Tədbirdə çıxış edən Hindistanın Azərbaycandakı səfiri  Abhay Kumar hind dilinin gözəlliyini, zənginliyini və əhəmiyyətini vurğulayaraq, onu fikir, duyğu və təcrübələrin ifadəsi üçün güclü vasitə olan sadə və ifadəli dil kimi səciyyələndirib. O qeyd edib ki, hind dili yalnız ünsiyyət vasitəsi deyil, həm də Hindistanın zəngin mədəniyyətinin, ədəbiyyatının, ənənələrinin və kollektiv şüurunun mühüm ifadəsidir. Səfir həmçinin böyük hindi yazıçı və şairlərinin dilin zənginləşdirilməsinə və onun ədəbiyyatının nəsillər boyu oxuculara çatdırılmasına verdiyi töhfəni vurğulayıb.



Səfir hind dilinin qlobal miqyasda artan yayılmasından danışaraq, onun dünyanın ən çox danışılan dillərindən biri olduğunu və dünyanın müxtəlif yerlərində hind dilini öyrənməyə marağın artdığını qeyd edib. Hind dili və ədəbiyyatı bir sıra ölkələrin universitet və təhsil müəssisələrində tədris olunur. Hindistan kinosu, musiqisi, ədəbiyyatı və rəqəmsal mediası isə hind dilinin qlobal miqyasda yayılmasını daha da genişləndirib. O vurğulayıb ki, Hindistandan kənarda hind dilinin artan populyarlığı yalnız dilə olan marağı deyil, həm də Hindistanın mədəniyyət və irsinə daha geniş marağı əks etdirir.
Azərbaycana toxunan səfir Abhay Kumar azərbaycanlı iştirakçıların Hindi Pakhwada çərçivəsində keçirilən tədbirlərdə, xüsusilə esse müsabiqəsində fəal iştirakından məmnunluğunu ifadə edib. O qeyd edib ki, Azərbaycan Dillər Universitetində azərbaycanlı tələbələrə hind dili tədris olunur. Azərbaycanda nəsillər boyu Hindistan filmlərinin və hindi mahnılarının davamlı populyarlığı isə iki ölkə xalqları arasında dərin mədəni yaxınlığı əks etdirir. Səfir hind dilinə göstərilən bu marağın Hindistan və Azərbaycan xalqları arasındakı güclü humanitar və mədəni əlaqələrin dəyərli hissəsi olduğunu vurğulayıb.

Proqram çərçivəsində tanınmış Hindistan yazıçı və şairlərin əsərlərindən şeirlər səsləndirilib, iştirakçılar tərəfindən hind dilində çıxışlar təqdim olunub. Tədbirdə həmçinin azərbaycanlı tələbələrin hind dilində esse müsabiqəsində fəal iştirakı qeyd edilib və qaliblərə mükafatlar təqdim olunub. Azərbaycanlı hind dili öyrənənlərin ədəbi və dil tədbirlərində iştirakı onların dilə artan marağını və özünəinamını nümayiş etdirib.
Tədbir mədəni anlaşmanın və insanlararası əlaqələrin möhkəmləndirilməsində hind dilinin mühüm rolunu bir daha nümayiş etdirib. 


Səfirlik vurğulayıb ki, hind dili Hindistanın dil və mədəni irsində xüsusi yer tutduğundan, onun təbliği, tədrisi və daha geniş auditoriyalara çatdırılması mühüm vəzifə olaraq qalır. Tədbirin keçirilməsi həmçinin Səfirliyin Azərbaycanda hindi dilinin və Hindistan mədəniyyətinin təbliği, eləcə də Hindistan və Azərbaycan xalqları arasındakı sıx mədəni əlaqələrin daha da dərinləşdirilməsi istiqamətində səylərini bir daha təsdiqləyib.

Reportyor.az 



KARUSEL / CƏMİYYƏT