Müdafiə Qüvvələrinin Komandanı və Ordu Qərargahının rəisi, feldmarşal Asim Munir ABŞ-ın Əfqanıstandakı 20 illik fəaliyyətinin strateji, diplomatik və əməliyyat aspektlərinin qiymətləndirilməsi zamanı regional baxışın, eləcə də Pakistanın təcrübəsinin nəzərə alınmasının vacibliyini vurğulayıb.

Yerli mətbuatın yazdığına görə, Feldmarşal bu fikirləri Ravalpindidəki Baş Qərargahda (GHQ) ABŞ-ın Əfqanıstan Müharibəsi Komissiyasının nümayəndə heyəti ilə görüş zamanı səsləndirib.

Ordunun mətbuat xidmətinin məlumatına görə, həmsədrlər Şamila N. Çaudari və doktor Kolin F. Ceksonun rəhbərlik etdiyi nümayəndə heyəti Pakistanın "Əfqanıstandakı münaqişə dövründəki uzunmüddətli rolunu və fədakarlıqlarını" etiraf edib.

"Inter-Services Public Relations" (ISPR) qurumunun bəyanatında qeyd olunur ki, səfərdə olan nümayəndə heyəti həmçinin İslamabadın regional sülh və sabitliyə davamlı töhfəsini yüksək qiymətləndirib.

Bəyanatda deyilir: "Nümayəndə heyəti ABŞ-ın Əfqanıstandakı 20 illik fəaliyyətinin təhlilini aparır". Əlavə olunub ki, hərbi rəhbərlə aparılan müzakirələr "Pakistanın dəstəyi, regional təhlükəsizlik mühiti və Əfqanıstandakı vəziyyət" kimi mövzuları əhatə edib və komissiyanın işi üçün əhəmiyyətli olan baxış bucaqlarına xüsusi diqqət yetirilib. Öz növbəsində, Müdafiə Qüvvələrinin Komandanı Munir münaqişəyə təsir edən təhlükəsizlik dinamikası ilə bağlı Pakistanın mövqeyini bölüşüb və müharibə dövründə ölkənin üzləşdiyi çətinlikləri vurğulayıb.

ISPR-in bəyanatında qeyd olunub ki, o, münaqişənin strateji, diplomatik və əməliyyat aspektlərinin qiymətləndirilməsində regional baxışın və Pakistanın təcrübəsinin nəzərə alınmasının zəruriliyini xüsusi vurğulayıb.

ABŞ Konqresi 2021-ci ildə ABŞ-ın 2001-ci ilin iyunundan 2021-ci ilin avqustuna qədər Əfqanıstandakı müharibə ilə bağlı qərarlarını təhlil etmək məqsədilə müstəqil bir qurum kimi Əfqanıstan Müharibəsi Komissiyasını təsis edib.


Reportyor.az 


KARUSEL / DÜNYA