Talıbovların bankı təhvil verərkən neçə milyon götürdüyü də açıqlandı
“Naxçıvan Bank” ASC-nin yeni səhmdarlarının adları açıqlanıb. Hazırda 94 milyon manat nizamnamə kapitalı olan bankın maliyyə hesabatında bildirilir ki, bankın yeni səhmdarları Hüseyn Yaşar oğlu Məmmədov (63,66%), Rüfət Əhədağa oğlu Məmmədov (26,52%) və Binnət Yasin oğlu Novruzovdur (9,82%).
Müşahidə Şurasında yer alan Rüfət Məmmədov və Binnət Novruzov kifayət qədər tanınmış şəxslərdir.
Bank səhmlərinin 26,52%-nə sahib olan Rüfət Məmmədov daha əvvəl ölkənin aparıcı şirkətlərindən olan “Gilan Holdinq”də İdarə heyətinin sədr müavini olub. Daha sonra “Gilan”a bağlı olan “Azər-Maya” ASC-nin İdarə Heyətinə sədr təyin edilib.
Azpolitika.info xəbər verir ki, R.Məmmədov Azərbaycanın Tibb Universitetində mikrobioloq kimi magistr dərəcəsinə 2007-ci ildə yiyələnib. 2020-ci ildə İsveçrənin Montrö Biznes Məktəbində MBA dərəcəsinə yiyələnib.
O, iş karyerasına yüksəlişə Danimarkanın Bakıdakı pivə istehsal edən törəmə şirkəti “Carlsberg Azerbaijan” şirkətində 2010-cu ildə direktor müavini kimi yiyələnib. İki il sonra, yəni 2012-ci ilin sentyabrında zavod direktoru təyin edilib.
Üç il sonra (2015-ci il sentyabr) “Gilan Holdinq”ə Əməliyyat direktoru kimi gəlmiş, 2016-cı ilin noyabrından 2020-ci ilin sentyabrına qədər isə həmin holdinqdə İdarə Heyəti sədrinin 1-ci müavini olub.
“Naxçıvan Bank” ASC-nin səhmlərinin 9,82%-nə sahib olan Binnət Novruzov isə əvvəllər “Rabitəbank” ASC-də baş direktor olub.
Eyni zamanda bankın Müşahidə Şurasının sədri olan Binnət Novruzov 1981-ci ildə anadan olub. 1998-2002-ci illərdə Azərbaycan Dövlət İqtisad Universitetində təhsil alıb.
2007-2008-ci illərdə “Unibank” ASC-də, 2009-2010-cu illərdə “Bank of Baku” ASC-də çalışıb. 2016-2021-cı illərdə “Rabitəbank” ASC-də baş direktor olub.
Binnət Novruzov 2021-2022-ci illərdə Dubayda (BƏƏ) fəaliyyət göstərən “SOCAR Overseas Ltd” şirkətində direktor müavini olub.
“Naxçıvan Bank” ASC-nin Müşahidə Şurasının yeni sədri hazırda İngiltərnin Mançester Universitetində magistr təhsili alır.
Onu da xatırladaq ki, Binnət Novruzov 2016-2021-cı illərdə baş direktor olduğu “Rabitəbank” ASC-nin əsas səhmdarı Dövlət Neft Şirkətinin (SOCAR) sabiq prezidenti, iqtisadiyyat nazirinin müavini Rövnəq Abdullayevin kürəkəni (qızının həyat yoldaşı) Rauf Zeynal oğlu Əliyevdir.
1992-ci il təvəllüdlü Rauf Əliyev hazırda “Rabitəbank” ASC-nin Müşahidə Şurasının üzvü və əsas səhmdarıdır. Bank səhmlərinin 40,6%-i Rauf Əliyevə məxsusdur.
“Naxçıvan Bank” ASC-nin əsas səhmdarı olan Hüseyn Məmmədov kim olması haqqında məlumat yoxdur. Bu şəxs ictimaiyyət arasında tanınan biri deyil. Hüseyn Məmmədov bankın digər 2 səhmdarından fərqli olaraq Müşahidə Şurasında da təmsil olunmur.
Qeyd edək ki, 2008-ci ildən dövlət qeydiyyatına alındıqdan sonra “Naxçıvan Bank” ASC səhmdarları haqqında məlumatları açıqlamayıb.
15 ildən sonra - 2022-ci il üçün açıqlanan maliyyə hesabatında bank səhmlərinin 63,66%-nin Naxçıvan Muxtar Respublikası Ali Məclisinin sabiq sədri Vasif Talıbovun oğlu Rza Talıbova, 20,48%-nin Talıbovun digər oğlu Seymur Talıbova, 9,82%-nin qızı Baharxanım Talıbovaya, 6,04%-i isə həyat yoldaşı Sevil Sultanovaya məxsus olduğu qeyd olunub.
Açıqlanan maliyyə hesabatında, həmçinin qeyd olunub ki, bu ilin fevral ayının 1-də Talıbovun ailə üzvləri “Naxçıvan Bank” ASC-dəki səhmləri satıblar.
***
Ölkədə yeganə regional bank olan “Naxçıvan Bank” ASC-nin Vasif Talıbovun ailəsinə məxsus olduğu qeyri-rəsmi olaraq bilinsə də, bank qanunvericiliyin müvafiq maddəsini pozaraq mülkiyyətçilərini gizli saxlayırdı.
Yalnıız  bankın 2022-ci il üzrə hesabatında onun səhmdarları açıqlanıb.
Məlum olub ki, 31 dekabr 2022 və 2021-ci illər tarixinə bankın səhmləri Talıbovlar ailəsindən 4 nəfərə aid olub.
Hesabata əsasən bankda Vasif Talıbovun oğulları Rza Talıbovun 63,66 %, Seymur Talıbovun 20,48 %, qızı Talıbova Baharxanım 9,82 %, Talıbovun nəvəsi Sultanova Sevil Rza qızının isə 6,04 % səhmi olub.

Hesabatda, həmçinin göstərilir ki, artıq 2023-cü ilin fevralın 1-dən Talıbovlar ailəsi bankın sahibliyini tərk ediblər və 14 milyon 59 min manat dividendlərini götürə biliblər.
Bankın səhmlərinin yeni mülkiyyətçiləri isə Hüseyn Məmmədov Yaşar oğlu (63,66 %), Rüfət Məmmədov Əhədağa oğlu (26,52 %) və Binnət Novruzov Yasin oğludur (9,82 %).

Xatırladaq ki, “Naxçıvan Bank” 2008-ci ildə yaradılıb. Bankın ölkədə 7 filialı və 1 şöbəsi fəaliyyət göstərir.

KARUSEL / ÖLKƏ