Sentyabrın 16-da Bişkekdə Türk Dövlətləri Təşkilatına (TDT) üzv dövlətlərin energetika nazirlərinin dördüncü iclası keçirilib.

İclasda TDT-nin baş katibi, Türkmənistan və Macarıstandan müşahidəçilər, həmçinin Azərbaycan, Qazaxıstan, Türkiyə, Özbəkistan və Qırğızıstanın energetika nazirləri və energetika idarələrinin nümayəndələri iştirak edib.

Görüşdə enerji sahəsində əməkdaşlıq məsələləri, o cümlədən Naxçıvan Sazişində, “Türk Dünyasına Baxış – 2040” konsepsiyasında və 2023-2027-ci illər üçün Enerji Əməkdaşlığı üzrə Fəaliyyət Planında nəzərdə tutulan vəzifələrin icrası müzakirə edilib.

Türkmənistanın Qırğızıstandakı səfiri N.Qolliyev qeyd edib ki, enerji sahəsində əməkdaşlıq dövlətlər arasında əməkdaşlığın mühüm istiqamətlərindən biridir və burada enerji resurslarının sabit və dayanıqlı tədarükünü təmin etmək üçün tərəfdaşlığın gücləndirilməsi üçün böyük perspektivlər mövcuddur.

Tərəflər yaşıl enerjinin inkişafına və enerji marşrutlarının şaxələndirilməsi imkanlarına xüsusi diqqət yetiriblər.

Görüşün yekununda enerji sahəsində əməkdaşlığın daha da gücləndirilməsinə dair birgə kommünike imzalanıb.
KARUSEL / İQTİSADİYYAT