Livan və Qətər baş nazirlərinin cümə günü verdikləri açıqlamaya görə, Qətər Livanın böhran içində olan enerji sektorunun dirçəldilməsinə və etibarlı elektrik enerjisi təchizatı ilə bağlı xroniki problemlərinin həllinə kömək edəcək.

Qaz ehtiyatları ilə zəngin olan Qətərin Baş naziri Şeyx Məhəmməd bin Əbdülrəhman Al Sani Livana səfəri zamanı bildirib: "Biz enerji sektorunda əməkdaşlıq üçün hərtərəfli çərçivə yaratmaq və səmərəli həll yolları təqdim etmək barədə razılığa gəldik".

O, bunun Qətərin Livanla illərdir müzakirə etdiyi "köhnə bir layihə" olduğunu qeyd edərək, layihənin artıq "həyata keçirilmək ərəfəsində" olduğunu vurğulayıb.

Livanın Baş naziri Nəvaf Salam layihənin Qətər tərəfindən icra və maliyyələşdiriləcəyini bildirib.

Salam qeyd edib: "Biz elektrik enerjisi istehsalı infrastrukturunun daha aşağı xərclə bərpası, inkişaf etdirilməsi və modernləşdirilməsini hədəfləyən bir layihənin reallaşdırılmasına yaxınıq".

Livanda elektrik enerjisi sektoru 1975–1990-cı illər vətəndaş müharibəsi başa çatdıqdan bəri ölkəyə 40 milyard dollardan çox başa gəlib; ard-arda gələn hökumətlər isə nə itkiləri azalda, nə də dağılmaqda olan infrastrukturu bərpa edə biliblər.


Reportyor.az 


KARUSEL / DÜNYA