Əfqanıstan İslam Əmirliyinin sözçü müavini Həmdullah Fitrət, Birləşmiş Millətlər Təşkilatının Əfqanıstana Yardım Missiyasının (UNAMA) son hesabatına cavab olaraq, missiyanı öz qiymətləndirmələrini dəqiq məlumatlara və obyektiv faktlara əsaslandırmağa çağırıb.

Fitrət bildirib ki, hesabatda Fəzilətin Təbliği və Pisliyin Qarşısının Alınması Nazirliyi, eləcə də İslam Əmirliyinin digər rəsmi qurumları tərəfindən bəzi şəxslərin saxlanılması halları “özbaşına” kimi təsvir edilib. Lakin o, bu saxlanmaların Şəriətə zidd hesab edilən əməllərin qarşısını almaq və həmin şəxsləri islah etmək məqsədilə, mövcud qanun və qaydalara uyğun şəkildə həyata keçirildiyini iddia edib.

Sözçü müavini əlavə edib ki, müxtəlif ölkələrdəki hökumətlər də bu cür saxlanma tədbirləri həyata keçirirlər.

O, həmçinin sual edib ki, nə üçün UNAMA-nın hesabatında İslam Əmirliyinin müxtəlif qurumlarının əhaliyə yardım göstərmək, geri qayıdan miqrantları yerləşdirmək, təhlükəsizlik təhdidlərinin qarşısını almaq, siyasi irəliləyişlərə nail olmaq və humanitar əhəmiyyət daşıyan böyük iqtisadi layihələri həyata keçirmək istiqamətindəki səyləri və nailiyyətləri qeyd olunmayıb.

UNAMA-nın yanaşmasını tənqid edən Fitrət bildirib ki, missiya Əfqanıstanla beynəlxalq ictimaiyyəti yaxınlaşdırmaq və anlaşılmazlıqları aradan qaldırmaq əvəzinə, onun “sistemə qarşı təbliğat” adlandırdığı fəaliyyətlə məşğuldur və Əfqanıstanı mənfi şəkildə təqdim etməyə çalışır. O, bu yanaşmanın missiyanın riayət etməli olduğu neytrallıq prinsipi ilə ziddiyyət təşkil etdiyini vurğulayıb.

Reportyor.az 



KARUSEL / DÜNYA