Dünya futbolunun idarəedici orqanı olan FIFA növbəti dörd il üçün 6,35 milyard dollarlıq inkişaf fondu yaratmağı planlaşdırır.

AFP bu barədə məlumat verib. 

Planın təsdiqlənməsi cümə axşamı Sürixdə keçiriləcək Şura iclasında nəzərdə tutulub; iclasda FIFA prezidenti Canni İnfantino və federasiyanın icraiyyə heyətinin digər 36 üzvü bir araya gələcək.

FIFA-nın 211 federasiyasına və regional konfederasiyalara vəsaitin paylanmasına imkan verəcək 2026–2030-cu illər üzrə bu inkişaf fondunu maliyyələşdirmək üçün qurum, kommersiya baxımından uğurlu keçəcəyi gözlənilən 2026-cı il Dünya Çempionatından sonra öz maliyyə ehtiyatlarından qismən istifadə edəcək.

İlk dəfə "Associated Press" tərəfindən açıqlanan bu plan, qurumun 211 üzv federasiyasının hər birinə 25 milyon dollar ödənilməsini nəzərdə tutur.

Bu məbləğ, İnfantinonun əsas tənqidçilərindən ikisi – Avropa konfederasiyası UEFA-nın rəhbəri Aleksandr Çeferin və Şimali və Mərkəzi Amerika və Karib hövzəsi konfederasiyası olan CONCACAF-ın rəhbəri Viktor Montaglianinin təklif etdiyi 10 milyon dollardan xeyli çoxdur.

Cümə axşamı keçiriləcək toplantı 28 apreldən bəri bu tipli ilk görüşdür və İnfantinonun bu yay Dünya Çempionatı kimi FIFA-nın əsas yarışlarını özəl investorlara açmaq istəyi ilə bağlı bəyanatından sonra dünya futbolunun idarəçiliyində yaranmış böhran fonunda baş tutur.

UEFA, CONCACAF və Asiya Futbol Konfederasiyasının (AFC) rəhbərlik etdiyi etirazlar və futbol dünyasından gələn genişmiqyaslı tənqidlər qarşısında həmin plandan nəhayət imtina edilmişdi.

Sentyabrın sonunda İnfantino qlobal qurumun fəaliyyətinin islah edilməsi məqsədilə federasiyalarla məsləhətləşmə prosesinə başlayıb və ilk təkliflərin elə cümə axşamı keçiriləcək Şura iclasında nəzərdən keçirilə biləcəyini açıqlayıb.

2016-cı ildən bəri FIFA-ya rəhbərlik edən 56 yaşlı funksioner 2027-ci ilin martında keçiriləcək seçkilərdə yenidən namizədliyini irəli sürəcək.

Onun rəqibləri indiyədək vahid namizəd ətrafında razılığa gələ bilməyiblər. Çeferin UEFA rəhbərliyində yeni bir müddətə namizədliyini irəli sürmək qərarına gəlib; bir sıra KİV-in məlumatına görə, Montaglianinin də CONCACAF-da eyni addımı atacağı gözlənilir.

Namizədliklərin təqdim edilməsi üçün son tarix 18 noyabrdır.

Reportyor.az 





KARUSEL / İDMAN