Dövlət mediasının məlumatına görə, çərşənbə günü İranın zorakılıq halları ilə müşayiət olunan cənub-şərq bölgəsində silahlı şəxslər tərəfindən həyata keçirilən iki ayrı hücumda dövlət təhlükəsizlik qüvvələrinin iki üzvü həlak olub.

AFP bu barədə məlumat verib. 

Dövlət televiziyası bildirib ki, Sistan-Bəlucistan əyalətinin Mehrestan rayonunda polis avtomobilinə edilən silahlı hücum nəticəsində bir polis əməkdaşı öldürülüb.

Məlumatda qeyd olunur ki, həmin ərazidə İran İslam İnqilabı Keşikçiləri Korpusuna (SEPAH) bağlı yarı-hərbi qüvvə olan "Bəsic"in qadın komandiri "düşmən muzdlu terror qruplaşmalarının üzvləri" tərəfindən qətlə yetirilib.

Son həftələrdə tarixi olaraq gərginliyin yüksək olduğu bu bölgədə təhlükəsizlik qüvvələri ilə silahlı şəxslər arasında toqquşmalar artıb.

İran Xarici İşlər Nazirliyinin sözçüsü İsmayıl Bəqai bazar ertəsi iddia edib ki, ölkənin şərqində fəaliyyət göstərən "terror qruplaşmaları" "İsrail və ABŞ tərəfindən ölkə sərhədlərində sabitliyi pozmaq məqsədilə hazırlanmış planlar" çərçivəsində hərəkət edirlər.

ABŞ və İsrail fevralın sonlarında İrana qarşı birgə hücuma keçərək, minlərlə insanın həyatına son qoyan Yaxın Şərq müharibəsini alovlandırıblar.

Pakistan və Əfqanıstanla həmsərhəd olan Sistan-Bəlucistan əyalətində uzun müddətdir ki, İran təhlükəsizlik qüvvələri, üsyançılar və narkotik qaçaqmalçıları arasında toqquşmalar baş verir.

İranın ən yoxsul əyalətlərindən biri olan bu bölgədə çoxsaylı bəluc əhalisi yaşayır.

Reportyor.az 



KARUSEL / DÜNYA