İki Müqəddəs Məscidin Xadimi Kral Salman bin Əbdüləziz Al Səud adından “Dünya ölkələrinə xurma paylanılması” proqramı çərçivəsində bu gün 5 tondan ibarət xurma hədiyyəsi Səudiyyə Ərəbistanı səfirliyi vasitəsi ilə Qafqaz Müsəlmanları İdarəsinə təqdim olunması ilə bağlı mərasim keçirilib.

Reportyor.az xəbər verir ki, mərasimdə Səudiyyə Ərəbistanı Krallığının Azərbaycandakı fövqəladə və səlahiyyətli səfiri İssam bin Saleh əl-Cuteyli, Qafqaz Müsəlmanları İdarəsinin Sədr müavini Bəxtiyar Nəcəfov və proqram nümayəndələri iştirak edib.

Səudiyyə Ərəbistanı səfiri İssam bin Saleh əl-Cuteyli deyib ki, bu kimi proqramların həyata keçirilməsi İki Müqəddəs Məscidi öz qoynunda saxlayan bir ölkə üçün təəccüblü deyil. Səudiyyə Ərəbistanı yarandığı dövrdən bu yana, Mərhum Kral Əbdüləziz, ondan sonra gələn layiqli rəhbərlər və hazırki rəhbərimiz Kral Salman və onun vəliəhdi Məhəmməd bin Salman həmişə dünyanın bütün ölkələrindəki müsəlmanların ehtiyacını yaxından duyub.


Diplomat əlavə edib ki, bugünkü mərasim Krallığın həyata keçirdiyi layihələrin davamıdır. Bu layihə çərçivəsində dünyanın 102 ölkəsi, o cümlədən Azərbaycan Respublikasında müqəddəs Ramazan ayı münasibəti ilə xurma sovqatı paylanılır. Krallığın Azərbaycan müsəlmanları üçün təqdim etdiyi bu sovqat Səudiyyə və Azərbaycan xalqları arasında qardaşlıq və dostluq tellərinin gücləndirilməsi üçündür: "Fürsətdən istifadə edərək bütün azərbaycanlı müsəlmanları müqəddəs Ramazan ayının gəlişi münasibəti ilə ürəkdən təbrik edirəm. Qeyd edim ki, Qafqaz Müsəlmanları İdarəsindən verilən məlumata görə, paylanılma prosesinə artıq start verilib və xurma payları nəinki Bakı şəhəri, hətta Azərbaycanın bir sıra bölgələrinə də çatdırılıb. Bu da o deməkdir ki, bu təşəbbüs öz gözlənilən hədəfinə çatıb”.

Xurma sovqatı üçün Səudiyyə Ərəbistanı hökumətinə və Dini İşlər Nazirliyinə təşəkkür edən QMİ sədrinin müavini Bəxtiyar Nəcəfov deyib ki, bu sovqat bizim üçün çox böyük əhəmiyyət kəsb edir. Çünki hər il olduğu kimi, Ramazan günlərində təqdim olunan bu sovqat müsəlmanlara paylanaraq onların sevincinə səbəb olacaq.

B.Nəcəfov qeyd edib ki, bu cür bayram sovqatları Azərbaycan və Səudiyyə xalqlarını bir-birinə daha da yaxınlaşdırır: "Buna görə də Səudiyyə Ərəbistanı kralı Salmana, vəliəhd şahzadə Məhəmməd bin Salmana, Dini İşlər Nazirliyinə və Krallığın ölkəmizdəki səfiri İssam bin Saleh əl-Cuteyliyə Qafqaz Müsəlmanları İdarəsinin sədri Şeyx həzrətləri və bütün Azərbaycan müsəlmanları adından minnətdarlığımızı bildiririk”.




KARUSEL / CƏMİYYƏT