Rusiyanın Pakistandakı səfirliyi bildirir ki, iki qonşu ölkə arasında gərginliyin hökm sürdüyü bir vaxtda puştu dili Əfqanıstan və Pakistan arasında qarşılıqlı anlaşmanın və barışığın təşviqinə kömək edə bilər.

Oktyabrın 27-də səfirlikdə "Advanced Pashto Grammar in Use" (İstifadədə olan təkmil puştu qrammatikası) kitabının təqdimat mərasimi keçirilib. Tədbirdə Rusiyanın Pakistandakı səfiri Albert P. Xorev, Əfqanıstanın Pakistandakı səfiri Sərdar Əhməd Şakib, kitabın müəllifi Hafiz-ür-Rəhman Doran, həmçinin elm xadimləri və media nümayəndələri iştirak ediblər.

Tədbirdə çıxış edən Xorev bildirib ki, Əfqanıstan və Pakistanın ortaq bir dili var və bu, hər iki ölkə xalqına bir-birini daha yaxşı anlamaq üçün mühüm imkan yaradır.

O, bu təşəbbüsü Rusiyanın dialoqu təşviq etmək və Kabil ilə İslamabad arasındakı fikir ayrılıqlarının həllinə kömək etmək istiqamətindəki növbəti səyi kimi xarakterizə edib.

"Rus dili Rusiya ilə Ukrayna arasında barışıq dili ola bildiyi kimi, puştu dili də Pakistan və Əfqanıstan arasında barışıq dilinə çevrilə bilər", - deyə Xorev qeyd edib.

Bu fikirlər, münasibətləri daim çətinliklərlə üzləşən Əfqanıstan və Pakistan arasında dialoqun inkişafında ortaq mədəni və dil əlaqələrinin oynaya biləcəyi potensial rolu vurğulayır.

Reportyor.az 


KARUSEL / DÜNYA