Cənubi Koreya Silahlı Qüvvələrinin Birləşmiş Qərargah Rəisləri Komitəsinin (BQRK) məlumatına görə, Şimali Koreya cümə axşamı günü şərq sahilləri istiqamətində dənizə təxminən 10 ədəd qısa mənzilli ballistik raket buraxıb.

BQRK-nın bəyanatında bildirilir ki, raketlər yerli vaxtla saat 12:30 radələrində (Qrinviç vaxtı ilə 03:30) Şimali Koreyanın şərq sahilində yerləşən Vonsan şəhəri yaxınlığındakı ərazidən atılıb.

Qurum əlavə edib ki, Cənubi Koreya ordusu müşahidəni gücləndirib və mümkün yeni buraxılışlara qarşı hazırlıq vəziyyətindədir; eyni zamanda, ABŞ və Yaponiya ilə yaxından məlumat mübadiləsi aparılır.

"Yonhap" xəbər agentliyinin məlumatına görə, Yaponiya Müdafiə Nazirliyi Şimali Koreyanın ballistik raket ola biləcək bir obyekt buraxdığını və həmin obyektin Yaponiyanın Müstəsna İqtisadi Zonasından kənara düşdüyünü açıqlayıb.

Yaponiyanın Sahil Mühafizəsi də daha əvvəl bildirmişdi ki, buraxılan obyekt ballistik raket ola bilər və o, artıq dənizə düşüb.

Şimali Koreya sonuncu dəfə oktyabrın 12-də ballistik raketlər buraxmışdı. Həmin vaxt Koreyalararası sərhəddə gərginlik yüksək idi; buna səbəb ötən ay baş verən və Cənubi Koreya əsgərlərinin yaralanması ilə nəticələnən mina partlayışı olmuşdu. Pxenyan bu il 10-dan çox raket sınağı həyata keçirib.

Reportyor.az 


KARUSEL / DÜNYA