Livan məhkəməsi, Hizbullah üzvlərinin 2022-ci ildə baş vermiş insidentdə əli olmaqda ittiham edildikdən sonra irlandiyalı Birləşmiş Millətlər Təşkilatının sülhməramlısını öldürməkdə təqsirli bilinən bir adamı qiyabi ölüm cəzasına məhkum edib.

23 yaşlı sıravi Şon Runi 14 dekabr 2022-ci ildə BMT-nin Livandakı Müvəqqəti Qüvvələrinin (UNIFIL) konvoyunun uzun müddətdir İranın dəstəklədiyi silahlı qruplaşmanın qalası sayılan Livanın cənubunda atəşə tutulması nəticəsində həlak olub, daha üç nəfər yaralanıb.

Mediaya məlumat vermək səlahiyyəti olmadığı üçün adının açıqlanmasını istəyən ədliyyə rəsmisi, Livan hərbi məhkəməsinin bazar ertəsi gecə yarısı bu işə dair qərarını verdiyini söyləyib.

"Məhkəmə əsas müttəhim Məhəmməd Əyyad haqqında ölüm hökmü çıxardı" deyən məmur, hökmün qiyabi olaraq çıxarıldığını bildirib.

Təhlükəsizlik mənbəsi 2022-ci ilin dekabrında AFP-yə bildirib ki, Hizbullah həmin ay Əyyadı orduya təhvil verib.

Lakin o, 2023-cü ilin noyabrında sağlamlığına görə həbsdən azad edilib və o vaxtdan bəri heç bir məhkəmə iclasında iştirak etməyib.

Hərbi məhkəmə, həmçinin məhkəmə iclasına saatlar qalmış təslim olan daha dörd nəfərə də bir sıra cərimələr və daha yüngül həbs cəzası verdi və beşinci şəxsə bəraət verdi.

UNIFIL patrulları ilə Hizbullah tərəfdarları arasında ara-sıra atışmalar baş verir, lakin onlar nadir hallarda şiddətlənir və ümumiyyətlə Livan səlahiyyətliləri tərəfindən tez bir zamanda nəzarət altına alınır.

2023-cü ilin iyun ayında ədliyyə rəsmisi beş Hizbullah üzvünün Runini öldürməkdə ittiham olunduğunu söylədi.

Hizbullah rəsmisi qrup üzvlərinin əli olduğunu təkzib etmişdi.

Təxminən 50 ölkədən 10,000 sülhməramlısı olan UNIFIL Livan və İsrail arasında bufer rolunu oynayır və sərhədə yaxın cənubda fəaliyyət göstərir.

Reportyor.az




KARUSEL / DÜNYA