ABŞ prezidenti Donald Trampın Nyu Dehlinin Rusiya neftini almağı dayandıracağına söz verməsindən sonra Hindistan cümə axşamı bildirib ki, enerji prioriteti vətəndaşlarının marağıdır.

Xarici media bildirir ki, Nyu Dehli Rusiyaya qarşı siyasəti dəyişdirdiyini nə təsdiq, nə də təkzib etdi.

Hindistan Xarici İşlər Nazirliyinin sözçüsü Randhir Jaisval verdiyi açıqlamada deyib ki, "uçucu enerji ssenarisində Hindistan istehlakçısının maraqlarını qorumaq bizim ardıcıl prioritetimiz olub. Bizim idxal siyasətimiz tamamilə bu məqsədə əsaslanır”.

Hindistanın baş naziri Narendra Modi daha əvvəl Moskvanın Ukraynanı işğal etməsinə baxmayaraq, Hindistanın tarixi tərəfdaşı olan Rusiyadan neft almağı müdafiə edib.

Tramp avqust ayında Hindistanın ABŞ-a ixrac etdiyi mallara rüsumları 50 faizə qaldırdı, Trampın köməkçiləri Hindistanı Rusiyanın Ukraynada müharibəsini qızışdırmaqda ittiham etdilər.

“Sabit enerji qiymətlərinin və təminatlı təchizatın təmin edilməsi enerji siyasətimizin iki məqsədi olmuşdur. Bura enerji mənbələrimizi geniş əsaslandırmaq və bazar şərtlərinə uyğun olaraq şaxələndirmək daxildir. ABŞ-a gəldikdə, biz uzun illərdir ki, enerji tədarükümüzü genişləndirməyə çalışırıq. Bu, son on ildə davamlı şəkildə irəliləyib. Hazırkı administrasiya Hindistanla enerji sahəsində əməkdaşlığın dərinləşdirilməsində maraqlı olduğunu nümayiş etdirir. Müzakirələr davam edir" -  Jaisval əlavə edib.

Dünyanın ən böyük xam neft idxalçılarından biri olan Hindistan neft tələbatının 85 faizindən çoxunu xarici təchizatçılardan alır.

Reportyor.az





KARUSEL / DÜNYA