BMT-nin Qaçqınlar üzrə Ali Komissarlığının (UNHCR) cümə axşamı verdiyi məlumata görə, 2023-cü ilin sentyabr ayından bəri altı milyondan çox əfqan Pakistan və İrandan qayıdıb və bu, Əfqanıstandakı xidmətlərə və icmalara böyük təzyiq göstərir.

BMT QAK-ın Əfqanıstandakı nümayəndəsi Ərafat Camal bu sözləri Ümumdünya Qaçqınlar Günündən əvvəl Kabildə keçirilən mətbuat konfransında deyib.

O, Əfqanıstanın kritik bir anda olduğunu, Ümumdünya Qaçqınlar Gününün qeyd edilməsinin qonşu ölkələrdən əfqanların genişmiqyaslı qayıtması ilə üst-üstə düşdüyünü söylədi.

Camal qeyd etdi ki, təkcə bu il ərzində 750 mindən çox insan İran və Pakistandan Əfqanıstana qayıdıb.

O, dünyanın ən böyük və ən uzun müddətli didərginlik vəziyyətlərindən birini həll etməyə kömək etmək üçün beynəlxalq dəstəyin artırılmasına çağırdı.

Camal əlavə etdi ki, maliyyə məhdudiyyətlərinə və artan humanitar ehtiyaclara baxmayaraq, BMT QAK-ın 2026-cı ildə ölkə daxilində həssas əfqanlara müdafiə və yardım göstərmək üçün 216,4 milyon dollara ehtiyacı var.

Onun sözlərinə görə, 31 may tarixinə olan məlumata görə, agentlik cəmi 56,7 milyon dollar alıb ki, bu da onun tələbatlarının təxminən dörddə üçünə bərabər maliyyə çatışmazlığı yaradıb və ehtiyacların artmaqda davam etdiyi bir vaxtda vacib humanitar proqramları risk altına qoyub.

Reportyor.az 



KARUSEL / DÜNYA