Bazar ertəsi günü cütlük təsdiqləyib ki, Prezident Donald Trampın böyük oğlu və onun yeni həyat yoldaşının toyundan sonrakı şənliklərin xərclərini Kreml ilə əlaqələri olan rusiyalı iş adamı ödəyib.

Donald Tramp kiçik və Bettina Tramp, Bettinanın "Instagram" hesabında birgə imzaladıqları paylaşımda bildiriblər ki, onların "əziz dostu" Umar Kremlev may ayında Baham adalarında "çox səxavətlə iki möhtəşəm şənlik gecəsi" təşkil edib.

Bu təsdiq "ProPublica" araşdırma saytının Kremlevin şənliklər üçün yüz minlərlə dollar məbləğində xərci öz üzərinə götürdüyü barədə məlumat yaymasından sonra gəlib.

"Bu, bir dostdan gələn son dərəcə səxavətli toy hədiyyəsi idi; buna görə hədsiz dərəcədə minnətdar idik və hələ də minnətdarıq", – deyə Bettina və Don Jr.-ın paylaşımında qeyd olunur".

Prezident Tramp toya və ya şənliklərə qatılmayıb; o, İranla bağlı müharibə müzakirələri zamanı Vaşinqtonda qalmalı olduğunu bildirib.

Kremlev Beynəlxalq Boks Assosiasiyasının (IBA) rəhbəridir; Beynəlxalq Olimpiya Komitəsi maliyyə idarəçiliyi və etik məsələlərlə bağlı dəfələrlə edilən xəbərdarlıqlardan sonra bu təşkilatla əlaqələri kəsmişdi.

IBA-nın mətbuat açıqlamasına (və orada yer alan Putinlə Kremlevin əl sıxarkən çəkilmiş şəklinə) əsasən, Rusiya Prezidenti Vladimir Putin aprel ayında Kremlevi "Dostluq" ordeni ilə təltif edib.

IBA-nın bəyanatında deyilir: "Mərasim zamanı Rusiya Prezidenti siyasi təzyiqlərə baxmayaraq idmançıları dəstəkləməkdə IBA-nın göstərdiyi əzmkarlığı yüksək qiymətləndirib".

IBA-nın veb-saytında həmçinin Donald Tramp kiçiyin 2025-ci ilin sentyabrında İstanbulda keçirilən tədbirdə Kremlevlə birlikdə səhnədə olduğu fotolar da yer alıb.

Bettina Trampın "Instagram" paylaşımına 20 foto əlavə olunmuşdu; bunların arasında yeni evlənən cütlüyün çimərlikdəki şəkli və Prezident Trampın digər övladları – Erik Tramp, İvanka Tramp və Tiffani Trampın fotoları da var idi.

Paylaşımda əlavə olunub: "Çox təəssüf doğurur ki, belə şəxsi və xoş bir hadisə sadəcə kiminsə kimliyinə və ya haradan gəldiyinə görə siyasi və ya şübhəli bir məsələ kimi təqdim oluna bilər".

"ProPublica" toyda çəkilmiş və Kremlevin başının üst hissəsinin göründüyü iddia edilən bir qrup fotosunu yayımlayıb. Rusiyanın araşdırmaçı media orqanı olan "Proekt"in məlumatına görə, əslən Tacikistandan olan Kremlev əvvəllər orta səviyyəli boks promouteri kimi fəaliyyət göstərib və Rusiyada yüksək vəzifəli məmurların təhlükəsizliyini təmin edən Federal Mühafizə Xidməti (FSO) ilə əlaqələr qurub.

Məlumata əsasən, Kremlev həmçinin Kremlyönlü "Gecə Canavarları" (Night Wolves) motosikletçi klubunun üzvüdür.

"Gecə Canavarları"nın üzvləri 2014-cü ilin martında Ukraynanın Krım yarımadasının Rusiya tərəfindən ilhaq edilməsindən dərhal sonra kütləvi şəkildə həmin əraziyə səfər etmiş, həmçinin təşkilat üzvləri Şərqi Ukraynada Rusiyayönlü separatçılarla çiyin-çiyinə döyüşmüşlər.


Reportyor.az 



KARUSEL / DÜNYA