TikTok süni intellekt (Sİ) ilə işləyən alış-veriş köməkçisini və istifadəçilərə məhsulları birbaşa tətbiq daxilindəki brendlərdən almağa imkan verən yeni ödəniş funksiyasını istifadəyə verdiyini elan edib.

"TechCrunch"ın məlumatına görə, bu iki funksiya istifadəçilərin platformadan çıxmadan məhsulları kəşf etməsini və satın almasını asanlaşdırmaq məqsədi daşıyır.

TikTok öz alış-veriş köməkçisini istifadəçilərə məhsulları tapmaqda və almaqda kömək edən ağıllı dialoq sistemi kimi təsvir edir.

Şirkət bildirir ki, köməkçi söhbətlərin kontekstini anlayır, həmçinin istifadəçilərin üstünlüklərini və ehtiyaclarını yadda saxlayır. O, məhsul təfərrüatları, çatdırılma məlumatları, ölçülər, mövcudluq və alış prosesinin tamamlanması ilə bağlı dərhal məlumat və dəstək təqdim edir.

Yeni ödəniş funksiyası istifadəçilərə tətbiqin alqoritmi əsasında videoların tövsiyə olunduğu "For You" (Sizin üçün) səhifəsindən birbaşa brenddən məhsul almağa imkan verir.

Bu funksiyalar TikTok-a alış-veriş prosesinin daha çox mərhələsini – məhsulun kəşf edilməsi və onun haqqında sualların verilməsindən tutmuş alışın tamamlanmasına qədər – tətbiq daxilində saxlamağa kömək edə bilər. İstifadəçilər həmçinin birbaşa video lentindən məhsullar barədə məlumat ala və onları satın ala bilərlər.

Şirkət bildirib ki, bu alətlər Salesforce, Shopify, Shoplazza və Stripe kimi ticarət platformaları və ödəniş xidməti təminatçıları ilə əməkdaşlıq çərçivəsində hazırlanır.

Platformanın onlayn ticarət məkanı olan "TikTok Shop" onun elektron ticarət sahəsindəki ambisiyalarında mərkəzi rol oynayıb. Bununla belə, yeni alətlər alış-veriş imkanlarını yalnız xüsusi ticarət bölməsi ilə məhdudlaşdırmır, həmçinin "For You" səhifəsi də daxil olmaqla tətbiqin digər hissələrinə də genişləndirir.

Bu genişlənmə TikTok-un alış-veriş vərdişlərinə təsirinin artmaqda davam etdiyi bir dövrə təsadüf edir.
TikTok-un iqtisadi təsir hesabatına əsasən, platformadakı fəaliyyət ABŞ-ın Ümumi Daxili Məhsuluna (ÜDM) 81 milyard dollar töhfə verib; eyni zamanda, 54 milyon amerikalı TikTok videosunda gördükdən sonra hər hansı məhsulu satın aldığını bildirib.
"TikTok Shop" ABŞ-da 2023-cü ilin sentyabrında istifadəyə verilib.

Bazar araşdırması şirkəti "eMarketer"in proqnozlarına görə, ABŞ-da "TikTok Shop" satışları 2025-ci ildə təxminən 15,8 milyard dollara çatıb ki, bu da ölkədəki ümumi sosial ticarət həcminin təxminən 18%-ni təşkil edir.

Reportyor.az 




KARUSEL / İQTİSADİYYAT