İspanaq tez-tez maqneziumla əlaqələndirilir, lakin bu vacib mineralın ən zəngin mənbəyi mütləq şəkildə ispanaq deyil. Bir sıra geniş yayılmış qida məhsulları daha yüksək miqdarda maqnezium ehtiva edir və onları gündəlik qidalanma rasionuna asanlıqla daxil etmək olar.

Orqanizm bir çox həyati funksiyalar üçün maqneziuma ehtiyac duyur. "Health" nəşri bu mineralı təmin etməyə kömək edə biləcək bir neçə qida mənbəyini qeyd edib.

Balqabaq tumu
Balqabaq tumu maqneziumla zəngin seçimlər siyahısında liderlik edir; eyni miqdarda balqabaq tumu bişmiş ispanaqdan təxminən altı dəfə çox maqnezium təmin edir. Onlar həmçinin zülal, lif, sink və dəmir mənbəyidir; salatlara və yulaf əzməsinə əlavə edilə və ya qovrulmuş halda yeyilə bilər.

Çia toxumu
Bir unsiya (28 qram) çia toxumu yaş və cinsdən asılı olaraq gündəlik maqnezium tələbatının təxminən 22-30%-ni ödəyir. Çia toxumu həmçinin lif və omeqa-3 yağ turşuları ilə zəngindir.

Badam
Badam da ispanaqdan daha çox maqnezium ehtiva edir; 100 qram badam eyni miqdarda ispanaqdakından təxminən üç dəfə çox maqnezium təmin edir. O, həmçinin zülal, lif və faydalı yağlarla zəngindir.

Keşu qozu
Hər 100 qram keşu qozu təxminən 251 milliqram maqnezium, eləcə də kalium, lif və faydalı yağlar təmin edir. Onları həm ayrıca yemək, həm də salatlara və müxtəlif yeməklərə əlavə etmək olar.

Tünd şokolad
Şokolad sevənlər maqneziumu tünd şokoladdan da əldə edə bilərlər. Tərkibində 70-85% kakao olan 100 qram tünd şokolad təxminən 228 milliqram maqnezium təmin edir.

Mütəxəssislər tərkibində azı 70% kakao olan növləri seçməyi və yüksək kalori miqdarına görə onları ölçülü şəkildə istehlak etməyi tövsiyə edirlər.


Reportyor.az 



SAĞLAMLIQ / KARUSEL