MAQATE: Şimali Koreya Yonbyondakı uran zənginləşdirmə zavodunu genişləndirir

BMT-nin nüvə enerjisi üzrə nəzarət qurumunun rəhbəri Rafael Qrossi çərşənbə günü bildirib ki, Şimali Koreya silah istehsalı üçün yararlı materialların istehsalını genişləndirməyə davam edərək, Yonbyon nüvə kompleksindəki mövcud uran zənginləşdirmə zavoduna əlavə tikili inşa edib.
Pxenyan 2009-cu ildə müfəttişləri ölkədən çıxardıqdan sonra Beynəlxalq Atom Enerjisi Agentliyinin (MAQATE) Şimali Koreyaya girişi yoxdur. Hazırda agentlik ölkədəki vəziyyəti əsasən peyk görüntüləri vasitəsilə izləyir.
Rəsmi adı Koreya Xalq Demokratik Respublikası (KXDR) olan Şimali Koreya bir neçə nüvə sınağı keçirib və nüvə silahının əsas hissəsini – nüvəsini – hazırlamaq üçün istifadə olunan iki materialı – yüksək dərəcədə zənginləşdirilmiş uran və plutoniumu – istehsal etməyə davam edir.
MAQATE-nin 35 ölkədən ibarət İdarə Heyətinin rüblük iclasında çıxış edən Qrossi bildirib: "Daha əvvəl sizə Kanqson və Yonbyondakı zənginləşdirmə obyektlərinin fəaliyyəti, Yonbyonda əlavə bir zənginləşdirmə obyektinin tikintisi, həmçinin KXDR-in silah istehsalı üçün yararlı nüvə materiallarının istehsalını daha da genişləndirdiyinə dair məlumatlar barədə hesabat vermişdim". Kanqson Pxenyanın cənub-qərb kənarında, Yonbyondakı daha böyük kompleks isə paytaxtdan daha uzaqda, şimalda yerləşir.
O, əlavə təfərrüat vermədən qeyd edib: "2026-cı ilin sentyabr ayının ortalarından etibarən Yonbyondakı mövcud zənginləşdirmə obyektinə yeni bir əlavə tikilir və bu tikili 2026-cı ilin oktyabr ayının sonuna qədər xarici görünüşcə tamamlanıb".
O əlavə edib ki, "KXDR-in uran zənginləşdirmə proqramının davamlı genişləndirilməsi ciddi narahatlıq doğurur". Qrossi bildirib ki, MAQATE həmçinin Yonbyondakı 5 meqavatlıq nüvə reaktorunun fəaliyyətini davam etdirdiyinə dair "əlamətlər müşahidə edib". Şimali Koreya bu reaktordan istifadə olunmuş nüvə yanacağından plutonium əldə etmək üçün yararlanır. Hazırda reaktor yeddinci şüalanma dövründədir; bu dövr başa çatdıqdan sonra istifadə olunmuş yanacaq yenidən emal olunmaq üçün çıxarılacaq.
O, həmçinin əlavə edib ki, Yonbyonda yerləşən digər bir reaktor – yüngül su reaktoru – bu ilin aprel ayından etibarən fəaliyyət göstərir.
Reportyor.az
KARUSEL / DÜNYA
Tarix: Bu gün, 18:02


























