Diabetin qarşısının alınmasında əsas amillər

Endokrinoloq Dr. İnna Miasnikova bildirir ki, sağlam yuxu, müntəzəm fiziki fəaliyyət və müxtəlif qidalarla zəngin rasion diabetin qarşısını almağa kömək edən amillərdir.
Onun sözlərinə görə, dünyada diabetdən əziyyət çəkən insanların sayı gündən-günə artır. Xəstəliyin ən geniş yayılmış növü 2-ci tip diabetdir və onun yaranma riski həyat tərzi ilə – o cümlədən çəki artımı, fiziki aktivliyin azlığı və qeyri-sağlam qidalanma ilə sıx bağlıdır.
"Təəssüf ki, müasir həyat tərzi bir çox insanı günün böyük hissəsini oturaq vəziyyətdə keçirməyə vadar edir; bu isə diabet və digər bir çox xroniki xəstəliklərin yaranma riskini artırır", – deyə o qeyd edir. "Qidalanma da risk faktorlarından biridir. Əlavə şəkərin, şirin içkilərin, həmçinin kolbasa, sosiska kimi emal olunmuş məhsulların və hazır yeməklərin həddindən artıq istehlakı 2-ci tip diabetin inkişaf ehtimalını yüksəldir."
Həkim əlavə edir ki, yuxusuzluq da xəstəliyin yaranmasına səbəb ola bilər və gecə ərzində 7-8 saat yatmağın vacibliyini vurğulayır.
"Yaxşı xəbər budur ki, xəstəliyin qarşısını almaq, hətta 2-ci tip diabetdə remissiyaya (simptomların yox olmasına) nail olmaq mümkündür", – deyə o izah edir. "Bu o deməkdir ki, müəyyən tədbirlər nəticəsində xəstəlik əlamətləri bir neçə il müddətinə aradan qalxa bilər. Sağlam qidalanma və fiziki aktivlik bu prosesdə mühüm rol oynayır; həmçinin, istər təbii yolla, istərsə də bariatrik cərrahiyyə vasitəsilə əhəmiyyətli dərəcədə çəki itirmək müsbət təsir göstərir."
Profilaktika ilə bağlı həkim təkcə zərərli qidalardan uzaq durmağı deyil, həm də hər gün faydalı qidalar qəbul etməyi tövsiyə edir və qida rasionunun müxtəlifliyinin vacibliyini vurğulayır.
"Rasionda bol miqdarda lif olmalıdır; lif isə tam taxıl məhsullarında və müəyyən digər qidalarda mövcuddur", – deyə o bildirir. "Son illərdə bağırsaq mikrobiomunun əhəmiyyətinə olan marağımız xeyli artıb."
Reportyor.az
SAĞLAMLIQ / KARUSEL
Tarix: Bu gün, 09:00


























