2027-ci ildən Cənubi Koreyada itlərin ətini yemək məqsədilə böyütmək və kəsmək, həmçinin it ətini satmaq qadağan ediləcək.
Bu qanun bu gün Seul parlamenti tərəfindən qəbul edilib və bununla da əsrlər boyu mövcud olan təcrübəyə son qoyulub.
“The Korea Times” yazır ki, 208 deputat qadağanın lehinə səs verib, daha ikisi bitərəf qalıb.
Bir itin öldürülməsi üç il həbs və ya 30 milyon von (21 min avro) cərimə ilə nəticələnəcək. Yemək üçün it yetişdirmək iki il həbs və ya 20 milyon von cərimə ilə nəticələnəcək. Bundan başqa, yeni qanun it əti sənayesində çalışan insanların yenidən ixtisaslaşmasına köməklik göstərəcək.
Cənubi Koreyada it əti ənənəvi olaraq istidə dözümlülüyü artırmaq vasitəsi hesab olunurdu. Son illərdə xüsusilə gənclər tərəfindən daha az yeyilir. Cənubi Koreyada it ətinin yemək qadağası bir neçə ildir müzakirə edilir və hazırkı prezident tərəfindən dəstəklənir. Heyvan haqları müdafiəçiləri digər məsələlərlə yanaşı, itlərin qəddar üsullarla – elektroşokerlə və ya asılaraq kəsilməsi praktikasını tənqid edirlər.
Cənubi Koreya Kənd Təsərrüfatı Nazirliyinin hesablamalarına görə, 2022-ci ilin aprel ayında təxminən 1100 təsərrüfatda yemək üçün itlər yetişdirilir. Ümumilikdə 570 000 it saxlanılır və 1600 restoranda it əti verilir.
Öz növbəsində, Koreya İt Əti İstehsalçıları və Satıcıları Assosiasiyası qadağanın 1,5 milyon itin saxlanıldığı təxminən 3500 it fermasına, eləcə də 3000 restorana təsir edəcəyini bildirib.(Azpost.info)

MARAQLI / KARUSEL