Banqkokun damdakı barlarından tutmuş Hanoyun gizli məkanlarına qədər, Asiyanın yeddi şəhəri Böyük Britaniyanın "Time Out" jurnalının tərtib etdiyi dünyanın ən yaxşı gecə həyatına malik şəhərlər siyahısında yer tutub.

Avqust ayında dərc olunan siyahıda şəhərlər gecə klubları, barlar, qiymət əlçatanlığı və qonaqpərvərlik kimi əsas amillər əsasında qiymətləndirilib.

Daha sonra redaktorlar, mədəniyyət ekspertləri və "Time Out" mütəxəssisləri səsvermə yolu ilə siyahını 20 istiqamətdən ibarət yekun siyahıya endiriblər. Onlardan yeddisi Asiyada yerləşir.


Banqkok, Tayland – 1-ci yer

Banqkokun gecələri səyyahın arzulaya biləcəyi hər şeyi – küçə kənarındakı barlardan tutmuş 360 dərəcə mənzərəli dam barlarına və şəhərin LGBT əyləncə məkanlarına qədər – təklif edir. Gündüzün istisi yerini qaranlıq düşəndən sonra canlanan şəhərə verir. Əyləncədən əlavə, Banqkokun gecə qastronomiya mühiti dəbdəbəli restoranlardan tutmuş gecə saat 2-də verilən küçəyə çıxarılmış düyü yeməklərinə qədər müxtəlif seçimləri əhatə edir.

Tayland paytaxtı gecə həyatı ilə bağlı bütün kateqoriyalarda yüksək nəticələr göstərib. Yerli sakinlərin 73%-i şəhəri insanlar arasında ünsiyyət qurmağın asanlığı baxımından "yaxşı" və ya "əla" kimi qiymətləndirib. Banqkok həmçinin "Time Out"un ümumi seçimində lider olub və ekspertlər arasında 95%-lik məmnunluq səviyyəsi qazanıb.


Pekin, Çin – 9-cu yer

Sanlitun rayonu bir çox gecə əyləncələrinin başlandığı yer olsa da, şəhərdə ən yaxşı axşamlar çox vaxt başqa məkanlarda keçir. Bu ərazi pivəxanaların, kokteyl barlarının və canlı ifa edən "indie" qruplarının çıxış etdiyi yeraltı (anderqraund) məkanların qarışığını təklif edir.

Pekindəki təhlükəsizlik mühiti müxtəlif məhəllələrdəki barları gəzməyi təhlükəsiz və xoş edir. Yerli sakinlər şəhəri gecə əyləncəsi üçün ucuz yer kimi xarakterizə edirlər. Sakinlərin 72%-i gecə həyatının keyfiyyətindən razı qalıb, 80%-i isə insanlararası əlaqəyə yüksək qiymət verib.


Honkonq, Çin – 12-ci yer

İllər ərzində Honkonqun gecə həyatı parlaq işıqlar və rəqs klublarından daha səmimi atmosferli barlarda içilən kokteyllərə doğru istiqamət dəyişib. "Lan Kwai Fong" və "Soho" rayonlarında yeni tipli klubların açılması davam edir və bu da şəhərin gecə həyatını daim yeniliklərlə zənginləşdirir.

"Time Out" ekspertlər heyətinin 60%-lik dəstəyi və gecə həyatı keyfiyyətinə görə 63 ballıq göstərici ilə Honkonq təhlükəsiz şəhər kimi təsvir edilib; yerli sakinlər həm sadə publara, həm də kokteyl barlarına böyük maraq göstərirlər.



Hanoy, Vyetnam – 15-ci yer

Hanoyda axşam əyləncəsi 10 000 Vyetnam donqu (0,40 ABŞ dolları) dəyərində pivə və ya kraft pivə zavoduna baş çəkməklə başlaya bilər. Lakin kokteyl və ya klub əyləncəsi üçün qonaqlar Köhnə Məhəllənin (Old Quarter) dar küçələrində gizlənmiş məkanları – məsələn, 2025-ci ildə Asiyanın ən yaxşı 50 barı siyahısına düşmüş "Workshop14" və ya "The Haflington"u – axtarıb tapmalıdırlar. Bu məkanlara çatmaq üçün çox vaxt asılmış paltarların arasından keçmək və ya hətta kiminsə evinin içindən addımlamaq lazım gəlir.

Şəhər icma ruhu baxımından ikinci yeri tutub; sakinlərin 82%-i burada dost tapmağın asan olduğunu bildirib. Hanoy həmçinin gecə həyatının keyfiyyəti və əlçatanlığına görə yüksək qiymətləndirilib.


Seul, Cənubi Koreya – 16-cı yer

Seulun gecə həyatı uzun müddət "soju" və pivə ilə müəyyən edilən içki mədəniyyətinin qaydalarını yenidən yazır. Gənc nəsil ənənəvi pablardan uzaqlaşaraq yaradıcı kokteyllərə (alkoqolsuz kokteyllərə) və gizli barlara ("speakeasy") üstünlük verir. Aşağı cinayətkarlıq səviyyəsi və səhər saat 6-ya qədər işləyən avtobuslar Seulun gecə həyatını təhlükəsiz və rahat edir.

Sakinlərin 83%-i şəhərin gecə həyatının keyfiyyətini yaxşı və ya əla kimi qiymətləndirib ki, bu da siyahıdakı ikinci ən yüksək göstəricidir. Şəhər həmçinin atmosfer və gecə həyatı məkanları baxımından yüksək bal toplayıb; respondentlərin 61%-i bu sahədə müsbət rəy bildirib.


Bengaluru, Hindistan – 17-ci yer

Bengaluru Hindistanın "pab paytaxtı" titulunda Mumbay və Dehlini geridə qoyub. Şəhər klassik rok barları və kraft pivə mədəniyyətini caz salonları, kokteyl məkanları və rahat musiqi məkanları kimi yeni və populyarlaşan istiqamətlərlə birləşdirir.

Yerli sakinlər şəhərin gecə həyatının keyfiyyətinə (71%) və icma daxilindəki əlaqələrə (82%) yüksək qiymət veriblər.


Sinqapur – 19-cu yer

Sinqapurun ən yaxşı əyləncə gecələri böyük lövhələrdə reklam olunmur. Səyyahlar hara baxmalı olduqlarını bilməlidirlər. Yeraltı incəsənət kollektivləri şəhərin gecə həyatını özünəməxsus şəkildə formalaşdırır.

Sinqapur təhlükəsiz şəhər kimi xarakterizə olunub və sorğuda iştirak edənlərin 93%-i bu fikirlə razılaşıb. Onun kokteyl mədəniyyəti də yerli sakinlər tərəfindən yüksək qiymətləndirilib; respondentlərin 50%-dən çoxu kokteyl barlarını şəhərin ən yaxşı gecə əyləncəsi kimi qeyd edib.



Reportyor.az 




MARAQLI / KARUSEL