ABŞ-ın Nyu-York, Nyu-Cersi və Konnektikut şəhərlərinə gələn şəxslər 14 gün müddətinə karantinə alınacaqlar.

"Report"un xüsusi müxbiri xəbər verir ki, bununla bağlı Nyu-York ştatının qubernatoru Endryu Kuomo (Andrew Cuomo) qərar qəbul edib. 
Qərar xüsusilə son günlərdə koronavirus qurbanlarının sayının sürətlə artdığı ABŞ-ın Alabama, Arizona, Florida, Şimali Karolina, Cənubi Karolina, Yuta, Texas və  Kaliforniyadan gələn şəxslərə şamil olunacaq.

E.Kuomo bildirib  ki,  yüksək infeksiya riski olan ştatlardan gələn səyahətçilər qərara könüllü şəkildə tabe olmazlarsa, 14 gün müddətinə məcburi karantin rejimi, daha sonra isə cərimələr tətbiq ediləcək. Belə ki, həmin şəxslər ilk qayda pozuntusuna görə 2 000 ABŞ dolları, növbətidə 5000 ABŞ dolları, qərara məhəl qoymadıqları təqdirdə isə 10 000 ABŞ dollarınadək cərimə olunacaqlar.

Qubernator son bir həftədə ABŞ-ın 27 ştatında koronavirus qurbanlarının sayının sürətlə  artdığını deyərək Nyu-Yorkun yenidən pandemiyanın episentri olmaması üçün bütün tədbirləri alacağını vurğulayıb.

Qeyd edək ki, iyunun 22-dən etibarən Nyu-York şəhərində mağazalar, pərakəndə ticarət mərkəzləri, restoranlar, bərbərxanalar və gözəllik salonları fəaliyyətə başlayıb. Qubernator və bələdiyyə sədri insanların normal yaşamına beş mərhələdə dönəcəyini və bunun üçün xüsusi proqram tətbiq edildiyini açıqlayıb. Hazırda Nyu-York şəhərində ikinci mərhələ tətbiq olunur.

SON XƏBƏR / GÜNDƏM