"Bugünkü gündəm regional təhlükəsizliyin təmin edilməsi və Əfqanıstanla bağlı praktiki əməkdaşlığın genişləndirilməsi istiqamətində səylərin əlaqələndirilməsi üçün vacibdir".
Bunu Yeni Dehlidə keçirilən Mərkəzi Asiya ölkələrinin "Milli Təhlükəsizlik Şuraları Katibləri"nin toplantısında Özbəkistanın Təhlükəsizlik Şurasının katibi Viktor Mahmudov deyib.
Toplantının gündəliyində terrorla mübarizə, regional təhlükəsizlik və Əfqanıstandakı vəziyyət üstünlük təşkil edən məsələlər olub.
Tacikistanın Təhlükəsizlik Şurasının katibi Nasrullo Mahmudzoda bildirib ki, dünyanın müxtəlif yerlərində qeyri-sabitlik və qeyri-müəyyənlik fonunda yeni çağırışlar və təhdidlər, o cümlədən kibercinayətkarlıq, kiberterrorizm və ekoloji və bioloji təhdidlər yaranır. O, son dərəcə dağıdıcı dini radikalizm ideologiyasının sürətlə irəlilədiyini vurğulayıb. 
Qırğızıstanın Təhlükəsizlik Şurasının katibi Marat İmankulov qeyd edib ki, Mərkəzi Asiya ölkələri və Hindistan terrorizm, ekstremizm və narkotiklərin qanunsuz dövriyyəsi ilə mübarizə tədbirlərinin hazırlanmasında ümumi maraqlara malikdir. İmankulov həmçinin Əfqanıstandakı vəziyyətin həllində ümumiliyi və onun regionda sülh, təhlükəsizlik və sabitliyə təsirini qeyd edib. 
Türkmənistanın Hindistandakı nümayəndəsi Şalar Geldinazarov çıxışı zamanı beynəlxalq terrorizm, narkotik vasitələrin qanunsuz dövriyyəsi və transsərhəd mütəşəkkil cinayətkarlıq kimi bütün regional və qlobal çağırışlara qarşı mübarizədə Mərkəzi Asiya ölkələri ilə Hindistan arasında tərəfdaşlığın gücləndirilməsi üçün qüvvələrin birləşdirilməsinin vacibliyini vurğulayıb:"Bu görüş Türkmənistan tərəfindən sülhün və sabitliyin təmin edilməsi və Əfqanıstanda təhlükəsizliyin təmin edilməsi üçün konsolidasiya edilmiş regional yanaşmanın inkişaf etdirilməsi mexanizmlərindən biri kimi qəbul edilir”. 
KARUSEL / DÜNYA / İQTİSADİYYAT