İyunun 2-də gözəl çimərlikləri və dəbdəbəli kurortları ilə tanınan Maldiv adaları Qəzzaya həmrəylik nümayiş etdirərək yəhudi ölkəsi vətəndaşlarının ada ölkəsinə girişini qadağan edəcəyini açıqlayıb.
Öz növbəsində, İsrailin Hindistandakı səfirliyi Lakshadveep, Kerala, Goa, Andaman və Nikobar adalarında Hindistan çimərliklərini tanıtmağa başlayıb. Səfirlik X sosial media platformasında hindistanlıların şəkillərini paylaşaraq, “Maldiv adaları artıq israilliləri qəbul etmədiyinə görə burada İsrailli turistlərin hərarətlə qarşılandığı və yüksək qonaqpərvərliklə rəftar edildiyi gözəl və heyrətamiz Hindistan çimərlikləri var” deyib.
İsrailin Hindistanın orta qərbindəki baş konsulu istehzalı bir təşəkkür məktubunda Maldiv hökumətinə "Maldiv hökumətinin qərarı sayəsində israillilər indi Lakshadveepin gözəl çimərliklərini kəşf edə bilərlər" deyib.

Maldiv hökuməti İsrail hərbçilərinin Qəzzaya hücumları ilə bağlı ölkədə artan qəzəb fonunda İsrail pasportu sahiblərinin Hind okeanı arxipelaqına daxil olmasını qadağan edən qanunlara dəyişiklik etməyi qərara alıb.

Sun.mv xəbər portalı xəbər verir ki, bu barədə qərarı daxili işlər naziri Əli İhusan Prezident Aparatında keçirdiyi fövqəladə mətbuat brifinqində açıqlayıb:"Kabinet bu gün İsrail pasportları ilə Maldiv adalarına girişi qadağan etmək üçün lazım olan hüquqi düzəlişləri mümkün qədər tez etmək qərarına gəlib", - o deyib. Xəbər portalı əlavə edib ki, kabinet prosesi sürətləndirmək üçün nazirlərdən ibarət xüsusi komitə yaradıb.

Maldiv adaları hər il bir milyondan çox turist qəbul edir. Buraya İsraildən gələn 15 minə yaxın turist daxildir. Nazirlər Kabineti, həmçinin Fələstinin Maldiv adalarından dəstək tələb etdiyi əraziləri müəyyən etmək və BMT-nin Fələstinli Qaçqınlara Yardım və İşlər üzrə BMT-nin Yaxın Şərq Agentliyi (UNRWA) vasitəsilə fələstinlilərə yardım etmək üçün vəsait toplama tədbirləri təşkil etmək üçün prezidentin xüsusi nümayəndəsi təyin etmək qərarına gəlib.
KARUSEL / DÜNYA