Hindistan Tacikistanda bir sıra böyük mədəni tədbirlərin təşkil edilməsini təklif edib.

Bu barədə Tacikistan rəsmi mediası «Ховар» xəbər verir.

Bildirilir ki, bu barədə Tacikistan Mədəniyyət nazirinin birinci müavini Obid Nəzəriyon ilə Hindistanın Tacikistandakı səfiri Rajeş Vayk ilə görüşündə müzakirə olunub.

Görüşdə iki ölkə arasında mədəni əməkdaşlığın inkişafı ilə bağlı vacib məsələlər müzakirə olunub və ikitərəfli əlaqələrin gücləndirilməsi üçün yeni sahələr müəyyən edilib.

Obid Nəzəriyon mədəni mübadilələrin xalqlar arasında dostluğun dərinləşməsində və qarşılıqlı faydalı əməkdaşlığın inkişaf etdirilməsində əsas rol oynadığını qeyd edib. O, Tacikistanın incəsənət, təhsil, turizm və mədəni irsin qorunması kimi sahələrdə Hindistanla əməkdaşlığı davam etdirməyə hazır olduğunu vurğulayıb. Görüşün əsas aspektlərindən biri daha sıx mədəni qarşılıqlı əlaqəni təşviq edəcək festivallar, sərgilər və təhsil proqramları kimi birgə tədbirlərin təşkili məsələsinin müzakirəsi olub.

Rajeş Vayk həmçinin mədəni əlaqələri genişləndirməyə hazır olduğunu bildirib. O, qeyd edib ki, Hindistan həmişə Tacikistanla tərəfdaşlığına dəyər verir və mədəniyyət və elm sahəsində əməkdaşlığı daha da inkişaf etdirməkdə maraqlıdır.

Səfir iki ölkə arasında əməkdaşlıq üçün yeni üfüqlər açacaq teatr tamaşaları, musiqi festivalları və təhsil təşəbbüsləri də daxil olmaqla bir sıra böyük mədəni tədbirlərin təşkilini təklif edib.

Təhsil sahəsində akademik mübadilə və əməkdaşlığa xüsusi diqqət yetirilib.

Reportyor.az



KARUSEL / DÜNYA