Əfqanıstanın Baş nazirin iqtisadi məsələlər üzrə müavini Molla Əbdül Qəni Bəradar və Türkmənistanın xarici işlər naziri Rəşid Meredov Türkmənistan-Əfqanıstan-Pakistan-Hindistan (TAPI) qaz kəməri, elektrik təchizatı və regional əlaqə də daxil olmaqla, əsas iqtisadi və infrastruktur layihələrini müzakirə ediblər.

Yerli media xəbər verir ki,  tərəflər TAPI layihəsini, Türkmənistan-Əfqanıstan-Pakistan (TAP) elektrik ötürmə layihəsini, eləcə də digər elektrik və dəmir yolu sxemlərini müzakirə ediblər.

Bəradar TAPI layihəsinin istifadəyə verilməsinin Əfqanıstan, Türkmənistan və regiondakı digər ölkələr arasında əlaqələrin genişləndirilməsi üçün yol açdığını bildirib və əlavə edib ki, Səudiyyə Ərəbistanının Delta International Group şirkəti layihəyə investisiya qoymaqda böyük maraq göstərib.

O, "Delta International" şirkətinin TAPI layihəsindən qazın alınmasına investisiya qoymaqda, Türkmənistanın əsas qaz yataqlarının tutumunu genişləndirməkdə, Herat əyalətinin Quzara rayonundan Qəndəhar əyalətinin Spin Boldak rayonuna və oradan Hindistan sərhədinə qədər qaz kəmərinin tikintisində və uzadılmasında, eləcə də Pakistanın Qvadar limanında böyük, müasir qaz mərkəzinin inşasında maraqlı olduğunu bildirib.

Baş nazirin müavini Türkmənistanı Torqundi-Herat dəmir yolu layihəsinin tikintisi ilə bağlı mövqeyini aydınlaşdırmağa çağırıb və Qazaxıstanın da bu sxemin həyata keçirilməsində maraqlı olduğunu qeyd edib.

O, Əfqanıstanın TAP layihəsinin marşrut xəritəsini yekunlaşdırmağa tam hazır olduğunu və Bala Murğab, Xmab və Qarqun rayonlarına elektrik enerjisinin ötürülməsi, eləcə də digər regional bağlantı layihələrinin başlanması üçün Əfqanıstan tərəfindən tam əməkdaşlığa zəmanət verdiyini bildirib.

Molla Bəradar həmçinin iki ölkə arasında davam edən layihələrdə əfqanlar üçün iş imkanları yaratmağın vacibliyini vurğulayıb.

Rəşid Meredov öz növbəsində Əfqanıstan İslam Əmirliyinin (ƏİƏ) TAPİ layihəsinin həyata keçirilməsi üçün əlverişli şərait yaratdığına görə təşəkkürünü bildirib və sxem üzrə işlərin cari təqvim ilinin sonuna qədər Herat əyalətinin mərkəzinə çatacağını bildirib.

O, xarici şirkətlərin qaz kəməri layihəsinə investisiya qoymaq marağını alqışlayıb və bu baxımdan sıx koordinasiyanın tələb olunacağını bildirib.

Meredov Türkmənistanın Torqundi-Herat dəmir yolu layihəsinə investisiya qoymağa hazır olduğunu bildirib və əlavə edib ki, Torqundidə işlərə artıq başlanılıb.

O, həmçinin ölkəsinin Əfqanıstana beş marşrut vasitəsilə elektrik enerjisi ötürməyə və təchizat gücünü artırmağa hazır olduğunu bildirib.

Reportyor.az 


KARUSEL / İQTİSADİYYAT