Beynəlxalq Miqrasiya Təşkilatının məlumatına görə, bu ay husi üsyançıları ilə hökumət qüvvələri arasında döyüşlərin şiddətlənməsindən bəri Yəməndə təxminən 94 min insan evlərini tərk edib.

Ən çox zərər çəkən ərazilər 48 mindən çox insanın köçkün düşdüyü Taiz və Lahc mühafəzələridir (əyalətləridir).

BMT-nin miqrasiya agentliyi evlərini tərk etməyə məcbur qalan ailələri sığınacaq, təmiz su və sanitariya şəraiti ilə təmin etmək üçün təcili dəstək çağırışı edir.

Həmçinin, 2 mindən çox insan kiçik qayıqlarla ölkənin şimal sahillərinə gələrək dəniz yolu ilə qonşu Cibutiyə keçib.

Beynəlxalq Miqrasiya Təşkilatının (IOM) qrupları sahilə çatanlara kömək edir, ərzaq paylayır və təcili sığınacaq təmin edir. Qadınlar və uşaqlar sahilboyu qurulmuş müvəqqəti örtüklərin altında şiddətli istidən qorunmağa çalışırlar.

Yenidən alovlanan döyüşlər Yəmənin yenidən genişmiqyaslı vətəndaş müharibəsinə sürüklənə biləcəyi ilə bağlı narahatlıqları artırır. 2022-ci ildə əldə edilən atəşkəs razılaşmasından əvvəl baş verən münaqişə nəticəsində təxminən 150 min insan həyatını itirmişdi.

İranın dəstəklədiyi husilər həmçinin Qırmızı dənizdəki əsas gəmiçilik marşrutunu təhdid edən strateji uğurlar əldə ediblər ki, bu da regional təhlükəsizliklə bağlı narahatlıqları daha da artırır.

Reportyor.az 



KARUSEL / DÜNYA