Orta yaş dövrünə qədəm qoyduqca, bir çox insan sevimli şalvarının düyməsini bağlaya bilməmək və ya gənclik illərindəki (iyirmi və otuzlu yaşlar) fit bədən quruluşunda olduğu kimi düzgün oturmayan köynəkləri görmək səbəbindən məyusluq və narahatlıq yaşayır.

Lakin "Journal of the American College of Cardiology" (JACC) jurnalında dərc olunan son araşdırmalara əsaslansaq, qarın nahiyəsindəki həmin piylər sadəcə arzuolunmaz artıq çəki deyil, həm də ürək xəstəliyi riskinin artdığına dair bir xəbərdarlıq ola bilər.

İndiyə qədər ürək xəstəliyi riskini qiymətləndirmək üçün insanın artıq çəkili və ya piylənmədən əziyyət çəkən olub-olmadığını müəyyən edən göstərici – Bədən Kütləsi İndeksi (BKİ) istifadə olunurdu.

Bununla belə, Amerika Kardiologiya Kolleci və ABŞ-dakı Cons Hopkins Universitetinin (JHU) tədqiqatçıları bildirirlər ki, bunun əvəzinə bel və omba nisbəti, eləcə də bel çevrəsi ölçülərindən istifadə edilməlidir; belə ki, ürək sağlamlığı ilə bağlı risklərin qiymətləndirilməsində bu göstəricilər BKİ-dən daha üstündür.

Başqa sözlə, tədqiqat qrupu qeyd edir ki, piylənmə, xüsusilə də qarın nahiyəsində piy toplanması, "ürək-damar sağlamlığı ilə bağlı mənfi nəticələr"in daha dəqiq göstəricisidir.

Bunun səbəbi ondadır ki, BKİ qarın nahiyəsindəki piyləri, xüsusilə də orqanların ətrafında toplanan və hətta ən ciddi pəhriz və məşq rejimlərinə belə tab gətirə bilən visseral (daxili orqanlar ətrafındakı) piyləri düzgün nəzərə almır.

Çəkinin (kiloqramla) boyun kvadratına (metrlə) bölünməsi yolu ilə hesablanan BKİ-yə yalnız belə əsaslanmaq, ürək-damar sistemi ilə bağlı müxtəlif problemlər kontekstində risk səviyyəsinin səhv qiymətləndirilməsinə səbəb ola bilər. Bu fikri tədqiqatın aparıcı müəllifi və JHU-nun baş biostatisti Dr. Zeina Dardari səsləndirib.

"Piyin bədəndə necə paylanması vacibdir və bu sadə ölçülər ürək-damar riski ilə bağlı gündəlik qiymətləndirmənin bir hissəsi olmalıdır", – deyə JACC-nin baş redaktoru və Yel Tibb Məktəbinin kardioloqu, professor Dr. Harlan Krumholz bildirib. O, həmçinin yalnız BKİ-yə diqqət yetirmək yanaşmasının əhatə dairəsinin genişləndirilməsi çağırışını edib.


Reportyor.az 



KARUSEL / CƏMİYYƏT