Bazar ertəsi günü rəsmi şəxs bildirib ki, "Pakistan Tehreek-e-Insaf" (PTI) partiyasının təsisçisi İmran Xanın bacıları Nərin Niyazi və Uzma Xan, Əlima Xanın saxlanılıb Kot Laxpat həbsxanasına köçürülməsindən bir gün sonra, 1960-cı il tarixli İctimai Asayişin Qorunması Qanununun (MPO) 3-cü maddəsi əsasında saxlanılıblar.

Yerli media bu barədə xəbər verir. 

Rayon Administrasiyasının məlumatına görə, Lahorun rayon rəhbəri (deputy commissioner) polisin tövsiyəsi əsasında 3-MPO maddəsi üzrə həbs qərarlarını verib.

Hazırda Adiala həbsxanasında saxlanılan İmranın iki bacısı 30 günlük müddətə həbs ediliblər.

Saxlanıldıqdan sonra Nərin və Uzma, digər bacıları Əlima Xanın da aparıldığı Kot Laxpat həbsxanasına köçürülüblər.

Bu həbslər PTI-nin ölkə miqyasında keçirəcəyi etiraz aksiyaları, o cümlədən İmranın azad edilməsi və Konstitusiyanın aliliyinin təmin olunması tələbi ilə sentyabrın 27-də İslamabada planlaşdırılan uzun yürüş ərəfəsində baş verib.

Mənbələr daha əvvəl bildirmişdilər ki, Əlimanın iki oğlu – Şahrez Xan və Şer Şah da Lahorda nəzarətə götürülüb.

Vəkil Rana Mudassir sonradan təsdiqləyib ki, Əlimanın oğulları qısa müddətli saxlanılmadan sonra sərbəst buraxılıblar.

Mudassirin sözlərinə görə, Nərin və Uzma gecə saat 2 radələrində Kot Laxpat həbsxanasına köçürülüblər.

Məlumata görə, Əlima bazar günü Lahorda idman zalına gedərkən saxlanılıb və daha sonra Kot Laxpat həbsxanasına aparılıb.

Həmin vaxt Nərin "Geo News"a bildirib ki, Əlima evdən çıxarkən saxlanılıb və onun Kot Laxpat həbsxanasına aparılması barədə məlumat alıb.

"Bilmirəm, niyə bu qədər narahatdırlar ki, hətta qadınları da həbs edirlər", - deyə Nərin bildirib.

PTI sədri vəkil Gövhər Əli Xan Əlimanın həbsini pisləyərək, bunu "vəziyyətin pisləşməsi istiqamətində ilk addım" adlandırıb.

"Biz həmişə aydın şəkildə bildirmişik ki, yürüşümüz dinc və siyasi xarakter daşıyacaq", - deyən vəkil Gövhər əlavə edib ki, partiyanın məqsədi konstitusiya və siyasi tələblərini dinc mübarizə yolu ilə həyata keçirməkdir.

"Biz heç bir qarşıdurma və ya zorakılıq istəmirik", - deyə o bildirib.


Reportyor.az 



KARUSEL / DÜNYA