Nigeriyanın səhiyyə naziri Məhəmməd Əli Pate bəyan edib ki, ölkədə təsdiqlənmiş ilk Ebola yoluxması halı "nəzarət altındadır" və xəstəliyin geniş ictimaiyyətə yayıldığına dair heç bir əlamət yoxdur.

42 yaşlı xəstə, əslən Uqandadan olan və Abucada fəaliyyət göstərən bir diplomatın həyat yoldaşıdır. O, Nigeriyaya qayıtmazdan əvvəl iki həftə ərzində Kampalada (Uqanda) istirahətdə olub.

Cümə axşamı çıxış edən nazir bildirib ki, xəstənin vəziyyəti stabildir və o, "sağalmağa doğru gedir".

Pate deyib: "Bu gün həkimlərlə danışdım; laboratoriya nəticələri ciddi yaxşılaşma olduğunu göstərir və onun tam sağalması ehtimalı var".

Səhiyyə rəsmiləri yoluxan şəxslə təmasda olanları müəyyən etmək işini gücləndirərkən, nazir əhalini "sakit qalmağa" çağırıb və əlavə edib ki, onlar genişmiqyaslı araşdırma aparırlar.

Xəstə ilə təmasda olan şəxslər təcrid olunublar və onlardan heç birində xəstəlik əlamətlərinin müşahidə olunduğu barədə məlumat yoxdur.

Pate bildirib ki, hazırda kütləvi tədbirlərlə bağlı planları dəyişdirməyə ehtiyac yoxdur, lakin vəziyyət dəyişərsə, əlavə tədbirlərin görülməsi istisna edilmir.

"Bizdə cəmi bir yoluxma halı var və ümid edirik ki, vəziyyət belə də qalacaq", - deyə o qeyd edib.

Nazir əlavə edib ki, yoluxma halı təsdiqləndikdən sonra Nigeriya beynəlxalq hava limanlarında Ebola ilə bağlı nəzarət tədbirlərini gücləndirib.

Hazırkı Ebola epidemiyası may ayında Konqo Demokratik Respublikasında başlayıb və o vaxtdan bəri daha üç Afrika ölkəsində qeydə alınıb.


Reportyor.az 


KARUSEL / DÜNYA