Mayın 10-dan etibarən Düşənbədə “Qırmızı avtobus turları” şəhərdaxili turizm marşrutları mövsümü başlayacaq.

Reportyor.az yerli mediaya istinadla bildirir ki, şəhərdaxili marşrutlar turizm sektorunu inkişaf etdirmək, paytaxtın turizm imkanlarını, potensialını təqdim etmək və onlardan səmərəli istifadə etmək, yerli və xarici turistləri daha çox cəlb etmək, habelə qonaqlara və turistlərə bir sıra turizm xidmətləri göstərmək üçün turizm proqramlarının qabaqcıl təcrübələrini tətbiq etmək məqsədilə Düşənbə şəhərinin Dövlət Hakimiyyətinin İcra Hakimiyyətinin təşəbbüsü ilə hazırlanıb.

Marşrutlar çərçivəsində sakinlər və qonaqlar paytaxtın tarixi, mədəni və turistik yerləri ilə tanış ola biləcəklər.


Tur zamanı bələdçilər tacik, rus və ingilis dillərində tacik xalqının tarixi, mədəniyyəti və zəngin keçmişi, eləcə də paytaxtın turizm imkanları haqqında ətraflı məlumat verəcəklər. Həmçinin qonaqlar üçün mədəni-əyləncə mühiti də yaradılacaq.

Şəhərdaxili turizm marşrutlarının müntəzəm fəaliyyəti 2025-ci il mayın 10-dan oktyabr ayına kimi davam edəcək.

Paytaxt ətrafında ekskursiya əvvəlcə həftə sonları, daha sonra isə hər gün qonaqların və turistlərin tələbi daxilində turizm agentliklərinin cəlb edilməsi ilə elektron bilet alınmaqla təşkil olunacaq.

Düşənbə - Hissor marşrutu da həftənin şənbə günləri istifadə olunacaq.

Bu marşrutların həyata keçirilməsinə turizm sahəsində xidmət göstərən təşkilatlar, o cümlədən “King Tour”, “Somon Travel” və “Diyor Travel” turizm və xidmət agentlikləri cəlb olunub.

Bu addım ilk dəfə ötən il atılıb və geniş sakinlər, qonaqlar və turistlər tərəfindən müsbət qarşılanıb.




KARUSEL / DÜNYA