Malayziya və Pakistan ticarət, investisiya, təhsil, halal məhsullar və antikorrupsiya səyləri də daxil olmaqla müxtəlif sahələrdə ikitərəfli əməkdaşlığı dərinləşdirmək barədə razılığa gəliblər. Malayziya Pakistandan 200 milyon dollar dəyərində halal ət idxal etmək niyyətində olduğunu açıqlayıb.

Bu barədə Pakistanın baş naziri Şahbaz Şərif və onun malayziyalı həmkarı Ənvər İbrahimin Kuala-Lumpurda nümayəndə heyəti səviyyəsində danışıqlardan sonra keçirdiyi mətbuat konfransında bildirilib.

Pakistanın baş naziri Malayziyaya ilk rəsmi səfəri zamanı ölkəsinin Malayziya ilə sıx əməkdaşlığa sadiqliyini təsdiqləyib və onun təcrübəsindən yararlanmaqda maraqlı olduğunu bildirib. O, kənd təsərrüfatı, informasiya texnologiyaları və peşə hazırlığı sahələrində birgə müəssisələrin yaradılması potensialını diqqətə çatdırıb.

Öz növbəsində, Malayziyanın Baş naziri Pakistan və Malayziya arasında iqtisadi əməkdaşlığın davamlı genişlənməsi ilə təhsil və müdafiə kimi sahələri əhatə edən güclü və dərin köklü əlaqələr kimi xarakterizə etdi.

O, müdafiə, kənd təsərrüfatı, rəqəmsal texnologiyalar, enerji və inkişaf etməkdə olan sektorlarda əməkdaşlığın dərinləşdirilməsi üçün böyük potensiala diqqət çəkib və Malayziyanın Pakistandan ət ixracını asanlaşdırmaq üçün çalışacağını vurğulayıb.

Malayziyanın baş naziri Pakistanın Qəzzə ilə bağlı mövqeyini təqdir edərək, Malayziya və Pakistanın Fələstin xalqının iztirablarına son qoymaq üçün konkret tədbirlərə çağırışlarını təkrarladıqlarını qeyd edib.

Reportyor.az


KARUSEL / DÜNYA