Səudiyyəli karateçi Dina Əhməd bazar günü Naqoyada keçirilən 20-ci Asiya Oyunlarında bürünc medal qazanaraq, bu yarışlarda medal əldə edən ilk səudiyyəli qadın kimi tarixə düşüb.

Krallığın yerli mediası xəbər verir ki,  Dina qadınlar arasında 68 kq çəki dərəcəsində bürünc medal uğrunda keçirilən görüşdə Nepal təmsilçisi Aruka Qurunqa qarşı möhtəşəm geri dönüş edərək, 3:0 hesablı geriliyi aradan qaldırdı və 8:7 hesablı qələbə ilə adını Səudiyyə idman tarixinə yazdırdı.

Bu bürünc medal Krallığın böyüklər arasında Asiya Oyunları tarixində qadınlar kateqoriyasında qazandığı ilk medal oldu və səudiyyəli qadınların beynəlxalq idman səhnəsində artan iştirakına daha bir mühüm nailiyyət əlavə etdi.

Onun komanda yoldaşı Səud Əl-Bəşir kişilər arasında 60 kq çəki dərəcəsində yarışda nepallı Tamanqı 2:0 hesabı ilə məğlub edərək Səudiyyə Ərəbistanına Oyunlardakı ikinci bürünc medalı qazandırdı.

Əl-Bəşir əvvəlcə taylandlı Sivakon Mueaktonqla heç-heçə (5:5) etdikdən sonra üstünlük göstəricisinə əsasən mərhələni adlamışdı. Daha sonra o, Küveyt təmsilçisi Abdullah Şaabana 11:8 hesabı ilə uduzsa da, bürünc medal uğrunda görüşə gedən yolda qırğızıstanlı Kalıkovu 10:2 hesabı ilə məğlub etməyi bacarmışdı.

Səudiyyə Ərəbistanının karate üzrə mübarizəsi bazar ertəsi davam edəcək: Məhəmməd Əl-Asiri Yaponiya vaxtı ilə saat 13:30-da kişilər arasında 67 kq-a qədər çəki dərəcəsində 1/8 final mərhələsində monqolustanlı rəqiblə qarşılaşacaq.

Rana Fəyyad isə saat 14:30-da qadınlar arasında 68 kq çəki dərəcəsində yarışda İordaniya təmsilçisi ilə üz-üzə gələcək.

Səudiyyə Olimpiya və Paralimpiya Komitəsinin prezidenti və Səudiyyə nümayəndə heyətinin rəhbəri şahzadə Əbdüləziz bin Türki Əl-Feysal bazar günü Naqoyada Səudiyyə komandasının bir sıra tədbirlərində iştirak edib.

Eyni zamanda, Səudiyyə Olimpiya və Paralimpiya Komitəsinin vitse-prezidenti, Səudiyyə nümayəndə heyəti rəhbərinin müavini və Asiya Triatlon Konfederasiyasının prezidenti şahzadə Fəhd bin Cələvi bin Əbdüləziz bin Musaed bazar günü Yaponiyanın Kamaqori şəhərində keçirilən kişilər arasında fərdi triatlon yarışının qaliblərinə medalları təqdim edib.


Reportyor.az 




KARUSEL / İDMAN