Əyalətdə fövqəladə vəziyyət elan edildikdən sonra Baş nazir Şahbaz Şərif Xayber-Paxtunxva (KP) əyalətindəki işlərə nəzarət etmək məqsədilə öz müavini İshaq Darın rəhbərliyi altında 11 nəfərdən ibarət komitə yaratdı.

Baş nazirə yaxın bir mənbə "Dawn" qəzetinə bildirib ki, komitə qeyri-rəsmi şəkildə formalaşdırılıb və onun yaradılması ilə bağlı heç bir rəsmi bildiriş verilməyib; lakin qurum KP-də idarəetmə və təhlükəsizlik məsələlərini gündəlik izləyəcək və Baş nazirə hesabat verəcək. Qurum KP-dəki yeni idarəetmə strukturu ilə sıx əlaqə saxlayacaq və onun (KP Məşvərət Şurasının) vəzifələrinin icrasında, həmçinin təhlükəsizliklə bağlı məsələlərdə yardım göstərəcək.

Bundan əvvəl Baş nazir əyalətdəki işləri idarə etmək üçün 11 nəfərdən ibarət KP Məşvərət Şurası və ya qubernator Faysal Kərim Kundinin "kabinet"ini yaratmışdı.

Eyni zamanda, Prezident Asif Əli Zərdari bu gün Senat və Milli Assambleyanın iclaslarını çağırdı. İclasların çağırılması, görünür, konstitusiya tələbinə uyğun olaraq KP-də fövqəladə vəziyyət və qubernator idarəçiliyi elanının təsdiqlənməsi məqsədi daşıyır.

Ədliyyə üzrə dövlət naziri vəkil Aqil bildirib ki, fövqəladə vəziyyət və qubernator idarəçiliyi dövrü altı aydan çox davam edə bilər. O, açıqlamasında qeyd edib ki, fövqəladə vəziyyətin müddəti KP-dəki təhlükəsizlik vəziyyətindən asılı olacaq.

Reportyor.az 



KARUSEL / DÜNYA