Səudiyyə Ərəbistanı, Ər-Riyaddakı Kral Abdullah İxtisaslaşmış Uşaq Xəstəxanasında həyata keçirilən 14,5 saatlıq mürəkkəb əməliyyatla Tanzaniyadan olan yapışıq əkizlər – Latins və Lovensi bir-birindən uğurla ayırıb.

Yerli media xəbər verir ki,  bu əməliyyat, Səudiyyə Ərəbistanının Yapışıq Əkizlər Proqramı çərçivəsində həyata keçirilən 75-ci uğurlu ayırma əməliyyatı, Tanzaniyadan olan yapışıq əkizlərlə bağlı isə dördüncü haldır.

Kral Salman Humanitar Yardım və Yardım Mərkəzinin (KSrelief) Baş Nəzarətçisi və tibbi-cərrahi qrupun rəhbəri Dr. Abdullah Əl-Rəbia bildirib ki, əməliyyat doqquz mərhələdə aparılıb və prosesdə müxtəlif tibb sahələrindən 44 məsləhətçi həkim, mütəxəssis, tibb bacısı və texniki heyət iştirak edib.

İki yaş iki aylıq olan əkizlər çanaq və bud nahiyələrindən birləşmişdilər; onların yoğun bağırsaqlarının bir hissəsi, onurğa sütunu, bel fəqərələri və onurğa beyni ortaq idi. Hər bir əkizin iki aşağı ətrafı var idi.

Tibbi heyətə anesteziologiya, uşaq cərrahlığı, uşaq neyrocərrahlığı, urologiya və plastik cərrahiyyə üzrə mütəxəssislər daxil idi.

Əkizlər 27 yanvar 2026-cı ildə Səudiyyə Ərəbistanına gətiriliblər. Burada onların ayrılmasının mümkünlüyünü müəyyən etmək və cərrahi plan hazırlamaq üçün hərtərəfli tibbi müayinə və qiymətləndirmələr aparılıb.

Tibbi qrup həmçinin əkizlərin vəziyyətini qiymətləndirmək və bu mürəkkəb prosedura hazırlaşmaq üçün bir neçə xüsusi iclas keçirib.

Hazırlıq mərhələsinin bir hissəsi olaraq, ayırma əməliyyatı üçün kifayət qədər toxuma əldə etmək məqsədilə əkizlərə bir neçə ay ərzində dərinin genişləndirilməsi proseduru tətbiq olunub.

Əməliyyatdan əvvəl Dr. Əl-Rəbia, əkizlərin ortaq anatomiyasının mürəkkəbliyini nəzərə alaraq, uğur ehtimalını 70% olaraq qiymətləndirmişdi.

O qeyd edib ki, bu uğurlu əməliyyat Səudiyyə Ərəbistanının Yapışıq Əkizlər Proqramı üçün növbəti mühüm mərhələdir. 1990-cı ildə yaradılan bu proqram çərçivəsində indiyədək beş qitədən və 29 ölkədən olan 160 hal qiymətləndirilib.

Əməliyyat İki Müqəddəs Məscidin Xadimi Kral Salmanın, həmçinin Vəliəhd Şahzadə və Baş nazir Məhəmməd bin Salmanın göstərişləri əsasında həyata keçirilib. Əl-Rəbiə, tibb qruplarına dünyanın müxtəlif yerlərindən olan uşaqlara ixtisaslaşmış tibbi xidmət göstərməyə və onların həyat keyfiyyətini yaxşılaşdırmağa imkan verən bu proqrama davamlı dəstəyinə görə Səudiyyə rəhbərliyinə təşəkkürünü bildirdi.

Əkizlərin anası isə uğurlu ayırma əməliyyatına töhfə verən tibbi xidmətə və tibb qrupunun səylərinə görə Səudiyyə Ərəbistanına və həkimlərə minnətdarlığını ifadə etdi.


Reportyor.az 


KARUSEL / DÜNYA