Millət vəkili Rafael Cəbrayılovun daha bir şəxsə külli miqdarda borcu olduğu üzə çıxıb. 

Reportyor.az yenisabah.az-a istinadən xəbər verir ki, bu, Yusif Orucov adlı vətəndaşdır. O, həkim işləyir.

Yusif həkim Rafael Cəbrayılovun “borc qalmaqalı”  barədə mediada yazılanları oxuduqdan sonra özü ilə bağlı problemi də ictimailəşdirmək qərarına gəlib və redaksiyamızla əlaqə saxlayıb. 

O, bildirib ki, 2015-ci ildə Rafael Cəbrayılova 240 min ABŞ dolları verib. “Biz Rafael Cəbrayılovun Binəqədidə tikdiyi binanın birinci mərtəbəsindən qeyri-yaşayış sahəsi almaq istəyirdik. Bu pulu da onun üçün vermişik. Lakin bir neçə aydan sonra aldandığımızı başa düşmüşük”,- deyə Yusif Orucov bildirib.

Onun sözlərinə görə, dəfələrlə Rafael Cəbrayılovla əlaqə saxlasa da, pulu geri ala bilməyib. “Əvvəllər “bu gün-sabah” deyirdi. Amma sonradan təhqir və təhdidlərə başladı. Təhqiramiz formada deyirdi ki, pulum yoxdur, nə istəyirsən məndən?!” deyən Yusif həkim məsələ ilə bağlı bir sıra dövlət qurumlarına və yüksək vəzifəli şəxslərə müraciət edib:

“Milli Məclisin sədrinə, Daxili İşlər nazirinə, Baş prokurora müraciətlər etmişəm. Lakin müsbət nəticəsi olmayıb. 4 ildir ki, bütün əsəblərim pozulub. 240 min dollar az pul deyil. Amma nə edəsən, kimə deyəsən”.

Şikayətçi məsələ ilə bağlı məhkəməyə müraciət etməyib. Yusif Orucov bunu belə izah edib. “Əvvəla, məhkəməyə müraciət etməyə vaxt yoxdur. Həm də düşündüm ki, müraciət etdiyim şəxslər problemi həll edər. Amma indi baxıram ki, artıq bu məsələ itimailəşib. Xeyli adama borcu varmış. Yəqin ki, mən də pulumu geri almaq müəyyən hüquqi addımlar barədə düşünəcəm”,- deyə şikayətçi bildirib.

Yusif Orucov bağlanmış müqavilənin surətini və kassa mədaxil qəbzini də redaksiyamıza təqdim edib. Sənədlərdən aydın olur ki, müqavilə Yusif Orucovun xanımı ilə Rafael Cəbrayılovun qardaşı Rauf Cəbrayılovun təsisçisi olduğu   “Binəqədi-İnşaat MMC-nin direktoru Aqil Mirqasım oğlu Talıbov arasında bağlanıb. Aqil Talıbov Rafael Cəbrayılovun bacısının həyat yoldaşıdır. Müqavilədən aydın olur ki, Orucovlar ailəsinə ödədikləri 240 min ABŞ dolları müqabilində Binəqədi rayonu, 8-ci mikrorayon, Ş.Məmmədova küçəsi, ev 8-in birinci mərtəbəsində 100 kvadratmetr qeyri-yaşayış sahəsi verilməli imiş.






MANŞET / MARAQLI / KARUSEL / GÜNDƏM / HADİSƏ / ÖLKƏ / REDAKTOR SEÇİMİ