Almaniyanın Bavariya əyalətindəki qaçqın düşərgələrində koronavirusa görə sığınacaq axtaranlardan götürülən test nümunələrindən 6-sı pozitiv çıxıb.

“Report”un Avropa bürosunun əldə etdiyi məlumatda deyilir ki, onların ikisi 2015-ci ildə Almaniyaya gələrək bu ölkədən sığınacaq istəyən azərbaycanlı ailənin üzvləridir. Koronavirusa yoluxan şəxslər Münhen şəhərindəki hospitala yerləşdiriliblər.

33 mindən çox insanın koronavirusa yoluxduğu, 834 nəfərin həyatını itirdiyi Almaniyanın Bavariya əyalətində qaçqın düşərgələrinin köçürülməsi müzakirə olunur. Ötən gün aralarında Azərbaycandan olan sığınacaq axtaranların da olduğu qaçqın düşərgələri və deportasiya mərkəzlərini ziyarət edən həkimlərdən ibarət xüsusi qrupun hazırladığı hesabatda yaşayış yerlərində sıxlıq, çox yataqlı otaqlar, tualet, duş və mətbəxdən ortaq istifadəyə görə koronavirusa yoluxma riskinin yüksək olduğu bildirilib, qaçqınların kiçik yaşayış məntəqələrinə yerləşdirilməsi tövsiyə olunub.

Bavariya əyalət hökuməti isə düşərgə və deportasiya mərkəzlərindəki ailələrin Münhen şəhəri yaxınlığındakı keçmiş radio zavodunun yataqxanasına köçürmək istəyir. Bu məqsədlə artıq sözügedən ərazidə ailələrin qalması üçün şəraitin yaxşılaşdırılması ilə bağlı layihə hazırlanıb.

Düşərgə və deportasiya mərkəzlərinin olduğu və 30 min insanın yaşadığı Yuxarı Bavariyada Pasxa bayramından sonra daha 104 nəfər koronavirusa yoluxub. Əyalət boyunca tətbiq olunan komendat saatının isə aprelin 19-dan sonra uzadılması gözlənilir.

SON XƏBƏR / KARUSEL / DÜNYA / HADİSƏ