“İran İslam Respublikası nüvə silahı istehsal etmək və ya əldə etmək niyyətində deyil, doktrinamızda bu cür silahlara yeri yoxdur”.

“Report” “Frans Press”ə istinadən xəbər verir ki, bunu İran Prezidenti İbrahim Rəisi BMT Baş Assambleyasında çıxışı zamanı deyib.

O, ölkəsinin nüvə proqramının məhdudlaşdırılması ilə bağlı razılaşmanın bərpasına ciddi yanaşdığını vurğulayıb, lakin Tehranın Vaşinqtonun hər hansı mümkün razılaşmaya sadiqliyinə etibar edə bilmədiyini söyləyib. “İstəyimiz yalnız birdir: öhdəliklərə əməl etmək” deyən İ.Raisi məhz ABŞ-ın sazişdən çıxan tərəf olduğunu qeyd edib.

“ABŞ nüvə sazişini tapdaladı”, - İran Prezidenti deyib. O, Qərbin tətbiq etdiyi sanksiyaları İran xalqına qarşı cəza adlandırıb.

Xatırladaq ki, 2015-ci ildə İran G6 ölkələri (ABŞ, Rusiya, Çin, Böyük Britaniya, Almaniya, Fransa) ilə Birgə Hərtərəfli Fəaliyyət Planı (BHFP) imzalayıb.

Plan nüvə proqramını məhdudlaşdırmaq müqabilində Tehrana qarşı iqtisadi sanksiyaların mərhələli şəkildə ləğvini nəzərdə tuturdu. 2018-ci ildə isə ABŞ sazişdən çıxdığını elan edib.

Avqustda Avropa İttifaqı BHFP-nin bərpasına dair sənədin kompromis variantını təqdim edib.

GÜNDƏM / SİYASƏT / DÜNYA