Məmməd Araz 1933-cü il oktyabrın 14-də Şahbuz rayonunda anadan olub. O, Azərbaycan Pedaqoji İnstitutunda, Moskvada Maksim Qorki adına Ədəbiyyat İnstitutunda oxuyub. Azərbaycan Dövlət Nəşriyyatında, “Ulduz” jurnalında, “Ədəbiyyat və İncəsənət” qəzetində işləyib. Azərbaycan Yazıçılar İttifaqının poeziya bölməsinə rəhbərlik edən Məmməd Araz 1974-cü ildən ömrünün sonunadək “Azərbaycan təbiəti” jurnalının baş redaktoru olub. Məmməd Araz yaradıcılığının baş qəhrəmanı Azərbaycandır. Onun “Vətən mənə oğul desə”, “Məndən ötdü, qardaşıma dəydi”, “Mənim Naxçıvanım”, “Ata ocağı”, “Ana yurdum, hər daşına üz qoyum” şeirləri vətən mövzusunda ən yaxşı əsərlər kimi dillər əzbəridir. “Atamın kitabı”, “Həyatın və sözün rəngləri”, “Oxucuya məktub”, “Qanadlı qayalar”, “Aylarım, illərim” kitabları ona böyük şöhrət gətirib. Onun əsərləri xarici dillərə tərcümə edilərək geniş oxucu kütləsinin məhsuluna çevrilib. Məmməd Araz “Əməkdar mədəniyyət işçisi” fəxri adı, “İstiqlal” ordeni ilə təltif edib. Böyük sənətkar 2004-cü ildə vəfat edib.

Tarix: 14-10-2024, 10:21