Birləşmiş Ştatların Rusiyanın işğalı ilə mübarizə aparan Ukrayna qüvvələrinə silah tədarük edəcəyini bildirməsindən bir neçə gün sonra BMT-nin baş katibi piyada əleyhinə minaların yenilənmiş təhlükəsini tənqid edib.

Reportyor.az xəbər verir ki, BMT-nin baş katibi Antonio Quterreş, Kambocada Piyadalar Əleyhinə Minaların Qadağası Müqaviləsi üzrə irəliləyişləri nəzərdən keçirmək üçün keçirilən konfransa göndərilən çıxışında dünya üzrə minaların təmizlənməsi və məhv edilməsi işini yüksək qiymətləndirib.

“Ancaq təhlükə qalmaqdadır. Bu, Konvensiyanın bəzi Tərəflərinin piyada əleyhinə minalardan yenidən istifadə etməsini, eləcə də bəzi Tərəflərin bu silahları məhv etmək üzrə öhdəliklərini yerinə yetirməməsini əhatə edir”, o, bəyanatda bildirib.

O, Rusiya və ya ABŞ-ın daxil olmadığı, Ukraynanın da daxil olduğu 164 ölkəni öz öhdəliklərini yerinə yetirməyə və Konvensiyaya əməl olunmasını təmin etməyə çağırıb.

Quterreşin sözlərini BMT baş katibinin müavini Armida Salsiah Alisjahbana söyləyib.

Konfransda iştirak edən Ukrayna komandası medianın ABŞ-ın mina təchizatı ilə bağlı suallarına cavab verməyib.

Keçən həftə Vaşinqtonun Kiyevə piyada əleyhinə minalar göndərəcəyi barədə açıqlaması insan haqları fəalları tərəfindən dərhal tənqid olunub

İstefada olan ABŞ administrasiyası yeni seçilmiş prezident Donald Trampın vəzifəsinə başlamazdan əvvəl Ukraynaya üstünlük verməyi hədəfləyir.

Ukrayna prezidenti Vladimir Zelenski minaları Rusiyanın hücumlarını dayandırmaq üçün “çox vacib” adlandırıb.

Konfrans 1960-cı illərdən otuz il davam edən vətəndaş müharibəsindən sonra dünyanın ən çox bombalanmış və minalanmış ölkələrindən biri olan Kambocada keçirilir.

Kambocanın baş naziri Hun Manet konfransda bildirib ki, ölkəsinin hələ də bir milyondan çox insanın həyatına təsir edən 1600 kvadrat kilometrdən çox çirklənmiş ərazini təmizləməsi lazımdır.

1979-cu ildən bəri Kambocada minalar və partlamamış hərbi sursatlar nəticəsində 20 minə yaxın insan həlak olub, iki dəfə çox insan yaralanıb.

Minaların Qadağası üzrə Beynəlxalq Kampaniya (ICBL) çərşənbə günü bildirib ki, keçən il dünyada ən azı 5757 nəfər mina və müharibə qalıqları qurbanı olub, onlardan 1983 nəfər ölüb.

Bildirilib ki, bütün qeydə alınan itkilərin 84 faizini mülki şəxslər təşkil edib.
KARUSEL / DÜNYA