İndoneziya Prezidenti Prabovo Subianto və Hindistan Baş naziri Narendra Modi çərşənbə günü birgə Yogyakartadakı məbəd kompleksində Prambanan Məbədi üçün İndoneziya-Hindistan Birgə Mədəni İrsin Qorunması Layihəsini başladıb.

İndoneziya yerli mediasl xəbər verir ki, simvolik mərasimdə Prabovo və Modi ikitərəfli mədəni irs əməkdaşlığı layihəsinin rəsmi açılışını qeyd edən lövhəni açıb.

Lövhə əsas məbəd komplekslərini əhatə edən kiçik köməkçi məbədlər olan pervaranın yaxınlığında yerləşir. Tarixi Hindu kompleksində təxminən 200 pervara məbədi səpələnib və onların bir çoxu xarabalıqlarda qalıb və bərpasını gözləyir.

Təqdimat mərasimində iştirak edən İndoneziya mədəniyyət naziri Fadli Zon bir gün əvvəl Cakartada ikitərəfli qoruma proqramının köməkçi məbədlərin bərpasına yönələcəyini bildirib.

O, bu açıqlamanı Prabovo çərşənbə axşamı Merdeka Sarayında Modini qəbul etdikdən sonra verib. İki lider çərşənbə günü UNESCO-nun Dünya İrsi Siyahısına daxil olan Prambanan Məbədini ziyarət etməklə yüksək səviyyəli görüşlərini davam etdiriblər.


Prezident helikopterində səyahət edən Prabovo və Modi Cənub-Şərqi Asiyanın ən böyük hindu məbəd komplekslərindən birini havadan seyr etdilər və sonra Nazirlər Kabineti katibi Teddi İndra Vijayanın idarə etdiyi arabada ərazini gəzdilər.

Səfər zamanı Modi məbədin əsas ərazisində vaxt keçirdi və həyətlərdən birində dua edən hindu ibadətçilərini salamladı.

Prabovo və Modi daha sonra ikitərəfli mədəni əməkdaşlıq barədə mətbuat açıqlamaları verərək birgə məbədin bərpası təşəbbüsünü vurğuladılar.

İki lider bir gün əvvəl Cakartadakı Merdeka Sarayında təkbətək görüşdən və ikitərəfli iclasdan sonra birgə bəyanat verərək İndoneziya ilə Hindistan arasında uzunmüddətli tərəfdaşlığı bir daha təsdiqləyərək bir sıra yeni əməkdaşlıq müqavilələrini elan etmişdilər.

Cakarta görüşləri zamanı iki ölkə müdafiə, tədqiqat, təhsil, mineral işlənməsi və səhiyyə sahələrini əhatə edən 16 əməkdaşlıq sənədi imzaladı.

Reportyor.az 

KARUSEL / DÜNYA