İsrail Baş naziri Binyamin Netanyahu, ABŞ prezidentinin Qəzza sülh planını irəli aparmaq üçün Qahirədə HƏMAS rəsmiləri ilə nadir görüş keçirdikdən bir gün sonra, bazar ertəsi günü Donald Trampın elçisi və kürəkəni Cared Kuşner ilə görüşməlidir.

Xarici mediaya bu barədə məlumat verən diplomatik mənbə bildirib ki, HƏMAS lideri Xəlil Əl-Həyya vasitəçilərin bazar günü Qahirədə Kuşner və Trampın Qəzza üzrə Sülh Şurasının elçisi Nikolay Mladenovla keçirdiyi bəzi görüşlərdə iştirak edib.

Bu, Kuşnerin ABŞ tərəfindən terrorçu hərəkat kimi tanınan Fələstin militant qrupu HƏMAS-ın nümayəndələri ilə ikinci məlum görüşüdür.

Kuşner əvvəllər 2025-ci ilin oktyabrında ABŞ elçisi Stiv Vitkoffla birlikdə HƏMAS rəsmiləri ilə görüşmüş və Qəzzada atəşkəsə və 7 oktyabr 2023-cü ildə İsrailə hücumlarda HƏMAS tərəfindən ələ keçirilən qalan girovların azad edilməsinə səbəb olan bir razılaşmanın əldə edilməsinə kömək etmişdi.

Tramp iyulun sonlarında HƏMAS və Qəzzada digər silahlı qrupların tamamilə tərksilah edilməsi üçün razılaşma əldə edildiyini bildirib.

Lakin oktyabr ayında keçiriləcək səsvermədə yenidən seçilmək istəyən Netanyahu Trampın planını açıq şəkildə rədd edib.

Tramp razılaşmanın mərhələlərlə həyata keçiriləcəyini, İsrail qüvvələrinin tərksilah prosesi davam etdikcə Qəzzadan çəkiləcəyini və Beynəlxalq Sabitləşdirmə Qüvvələrinin anklavı təmin etmək üçün yeni Fələstin polis qüvvələri ilə birlikdə işləyəcəyini bildirmişdi.

Həmas plana razı olduğunu, lakin razılaşmanın həyata keçirilməsinin İsrailin əvvəlcə geri çəkilmə və hücumların dayandırılması da daxil olmaqla öz öhdəliklərini yerinə yetirməsindən asılı olacağını bildirib.

Reportyor.az 



KARUSEL / DÜNYA