Husilərin Səudiyyə Ərəbistanına hücumları davam edərkən, Pakistan Silahlı Qüvvələrin İctimaiyyətlə Əlaqələr İdarəsinin (ISPR) Baş direktoru, general-leytenant Əhməd Şərif Çaudri bildirib ki, Pakistan Yəmənin beynəlxalq səviyyədə tanınmış hökumətindən birbaşa hərbi dəstək üçün daxil ola biləcək hər hansı müraciəti “qiymətləndirə” bilər.

Bazar günü "Independent Arabia" nəşrinə müsahibə verən general-leytenant Çaudri, Yəmən hökumətinin Pakistandan dəstək istəyib-istəmədiyi ilə bağlı suala cavab olaraq deyib: "Bildiyim qədərilə, hər hansı rəsmi müraciət daxil olmayıb. Əgər belə bir müraciət olarsa, onu qiymətləndirmək və cavab vermək Pakistan hökumətinin səlahiyyətindədir".

ISPR rəhbəri xəbərdarlıq edib ki, əgər danışıqlar uğursuzluqla nəticələnərsə və Yaxın Şərqdə hərbi qarşıdurma baş verərsə, "Məkkə Birgə Müdafiə Sazişi"nin (MJDA) kollektiv çəkindirmə mexanizmi işə düşə bilər.

O qeyd edib ki, Pakistan, Səudiyyə Ərəbistanı və Türkiyə arasında imzalanan bu saziş qısa müddət ərzində əhəmiyyətli dərəcədə inkişaf edib və üç ölkənin ortaq baxışını əks etdirir.

Regional güclər sözügedən sazişi avqustun 7-də, Məkkədə keçirilən Birgə Müdafiə Sammiti zamanı imzalayıblar. Sazişə əsasən, bu üç ölkədən hər hansı birinə qarşı həyata keçirilən silahlı hücum, hər üç ölkəyə qarşı hücum kimi qəbul ediləcək.

General-leytenant Çaudri bildirib ki, bu saziş regionda sülh, sabitlik və rifahın təmin olunmasına sadiq qalan üç ölkənin ortaq mövqeyini ifadə edir.

O, Səudiyyə Ərəbistanının suverenliyi və ərazi bütövlüyünün Pakistan üçün əsas prioritetlərdən biri olduğunu vurğulayıb, həmçinin İslamın iki ən müqəddəs məkanının qorunmasının da eyni dərəcədə vacib olduğunu əlavə edib.

Pakistanın mövqeyinin aydın və birmənalı olduğunu bir daha vurğulayan Çaudri qeyd edib ki, İslamabadın mesajı artıq ölkənin siyasi və hərbi rəhbərliyi vasitəsilə çatdırılıb.

Hərbi sözçünün bu açıqlamaları, Səudiyyə Ərəbistanının rəhbərlik etdiyi koalisiya ilə paytaxt Sənanı və şimalın böyük hissəsini nəzarətdə saxlayan husilər arasında döyüşlərin son həftələrdə şiddətləndiyi bir vaxta təsadüf edir. Bu qarşıdurma, ABŞ və İsrailin İrana qarşı apardığı müharibənin növbəti cəbhəsinə çevrilib. Husilər son günlərdə bölgədə yenidən döyüşlər baş verərkən Ər-Riyadın beynəlxalq hava limanına, Məkkə və Mədinəyə hücum ediblər.

Qruplaşmanın irəliləməsi, atəşkəsin pozulmasından sonra strateji Bab əl-Məndəb neft daşıma marşrutunu da təhdid edir.

General-leytenant Çaudrinin sözlərinə görə, husilərin İslamın ən müqəddəs yerlərinə hücumları ictimaiyyət, siyasi və hərbi rəhbərlik arasında dərin kədər və qəzəbə səbəb olub.

Regional təhlükəsizlik vəziyyəti ilə bağlı general-leytenant Çaudri, hərbi gərginliyin artmasının heç bir ölkəyə fayda verməyəcəyi barədə xəbərdarlıq edərək, Yaxın Şərqdə hərbi münaqişənin genişləndirilməsinin heç kimin marağında olmadığını və danışıqlar yolu ilə həll yoluna çatmağın vacibliyini vurğulayıb.

O, MJDA-nın rəhbərliyinin və fəaliyyət kursunun aydın olduğunu, onun heç bir aqressiv niyyətinin olmadığını və hər hansı bir ölkəyə qarşı yönəlmədiyini vurğulayıb.

General-leytenant Çaudri həmçinin müsəlmanlar arasında birliyə çağıraraq bildirib ki, regiondakı ölkələr bir-biri ilə vuruşmaq əvəzinə, fikir ayrılıqlarını həll etmək üçün çalışmalıdırlar.

O, Məkkə ittifaqının bölgədə sülh, sabitlik və təhlükəsizliyi təşviq etməyi hədəflədiyini bir daha vurğuladı və mübahisələrin hərbi eskalasiya əvəzinə danışıqlar yolu ilə həll edilməli olduğunu əlavə etdi.


Reportyor.az 



KARUSEL / DÜNYA