Məlum olduğu kimi, ABŞ-nin 47-ci Prezidenti Donald Trampın ötən gün andiçmə mərasimi keçirilb.

Mərasimə keçmiş ABŞ prezidentləri də daxil olmaqla, bir çox xarici ölkə rəsmiləri, milyarderlər, eləcə də müxtəlif qlobal şirkətlərin nümayəndələri qatılıb.



Onlar arasında diqqət çəkən simalardan biri Trampın qatı əleyhinə olduğu və qapadılacağı ilə bağlı xəbərdarlıqlar etdiyi “TikTok” sosial şəbəkəsinin baş direktoru Şou Zi Çev olub. O, Trampın kəşfiyyat xidmətinin başına gətirmək istədiyi Tulsi Qabbardın yanında əyləşmişdi. Qeyd edək ki, Çin mənşəli şirkət Vaşinqton tərəfindən təsdiqlənmiş alıcı tapmasa, “TikTok” qadağa təhlükəsi ilə üzləşəcək.



Bundan əlavə milyarderlər və texnologiya nəhəngləri eyni sırada əyləşmişdilər. Dünyanın ən varlı 5 adamından 4-ü bu mərasimdə idi. Onların arasında – “Facebook”-un qurucusu Mark Zukerberq, “Amazon”-un qurucusu Cef Bezos, “Google”-un baş direktoru Sundar Piçai və dünyanın ən varlı adamı, “Tesla”-nın baş direktoru İlon Mask var idi. Bundan əlavə fransız “LVMH” şirkətinin baş direktoru, lüks malların ən böyük istehsalçısı Bernard Arnault isə əks tərəfdə əyləşmişdi. Mərasimə qatılmayan şəxs isə 210 milyard dollarlıq sərvəti ilə dünyanın ən varlı üçüncü adamı hesab olunan yəhudi əsilli amerikalı milyarder Larri Ellison olub.



Keçmiş ABŞ prezidentləri - Bill Klinton, Barak Obama, Corc Buş və Co Bayden də mərasim üçün nəzərdə tutulan önəmli yerlərdə oturdulmuşdular. Onların xanımları da həmin sırada idi, lakin keçmiş birinci xanım Mişel Obama mərasimdə iştirak etməyəcəyini öncədən açıqlamışdı.



Qeyd edək ki, Tramp bu dəfə xarici liderləri də andiçmə mərasiminə dəvət etmişdi. Argentina Prezidenti Xavier Milei, İtaliyanın Baş Naziri Giorgia Meloni ilə yanaşı oturmuşdu. Onlar Çini təmsil edən vitse-prezident Han Zheng və Çinin ABŞ-dəkı səfiri Xie Feng ilə birlikdə mərasimi izləyirdilər. Böyük Britaniyanın keçmiş baş naziri Boris Conson da orada olub.("AzPolitika.info")


MARAQLI / KARUSEL