ABŞ Konqresinin təxminən 70 üzvü FİFA-ya məktub göndərərək, dünya çempionatının biletlərinin qiymətlərini aşağı salmağı və turnirə ev sahibliyi edən şəhərlərə maliyyə dəstəyi göstərməyi tələb edib.
Məktub Kaliforniya nümayəndəsi Sidney Kamlaqer-Davın təşəbbüsü ilə digər 68 demokrat tərəfindən imzalanıb.

“The Athletic” xəbər verir ki, Dav azarkeşlərin, yerli satıcıların, restoran sahiblərinin və digər biznes sahiblərinin yüksək qiymətlərdən narazı olduğunu bildirib:
“Mən azarkeşlər və şəhər sakinləri ilə danışdım. Onlar soruşurdu: “FİFA üçün nə ödəyirik? Onlar necə kömək edir?” Cavab: “Heç nə etmir, heç nə təmin etmir”. Təhlükəsizlik, azarkeş tədbirləri, şəhər tərəfdaşlıqları, nəqliyyat – bunların hamısı şəhərin üzərinə düşür. Şəhərin bundan hansı faydası var? Heç bir faydası yoxdur”.
Məktub 23 ştatı təmsil edən konqresmenlər tərəfindən imzalanıb, o cümlədən dünya çempionatı oyunlarına ev sahibliyi edəcək 11 metropoliten şəhərdən hər birindən ən azı bir nümayəndə: Los-Anceles, San-Fransisko körfəzi, Nyu-York və Şimali Nyu-Cersi, Cənubi Florida, Sietl, Filadelfiya, Hyuston, Boston, Dallas, Atlanta və Kanzas-Siti.
O, həmçinin vurğulayıb ki, digər kanallar vasitəsilə FİFA-ya narazılığını çatdırmağa çalışıb, ancaq cavab ala bilməyib:
“FİFA kifayət qədər qapalıdır və onların şəhərlərə faydası çox məhduddur”.
Yayda keçiriləcək dünya çempionatı ABŞ, Kanada və Meksikada təşkil olunacaq. (Komanda.az)


Reportyor.az 


KARUSEL / İDMAN