Şri-Lankanın dənizçilik orqanları çərşənbə günü bildirib ki, adanın cənub sahillərində ABŞ-ın sanksiyası altında olan 11 İran neft tankerindən ibarət donanmanı izləyir.

Gəmilər qeyri-müəyyən vəziyyətdədir - ABŞ-ın İran limanlarından istifadə edən gəmilərə qarşı blokadası səbəbindən İrana qayıda bilmirlər.

Gəmilər mart ayında ABŞ sualtı qayığı tərəfindən batırılan və 104 dənizçinin ölümünə səbəb olan İran freqatı IRIS Dena-nın Qalle limanının yaxınlığında müşahidə edilib. Şri-Lankanın donanması həmin freqatdan 32 İran dənizçisini xilas edib.

Anonimlik şərti ilə AFP-yə hərbi rəsmi bildirib ki, "Biz bu İran gəmilərini 12 dəniz mili ərazi sularımızdan kənarda izləmək üçün kəşfiyyat təyyarələri və patrul qayıqları yerləşdirmişik".

Gəmilər Şri-Lanka ərazisinə daxil olmaq üçün icazə istəməyiblər və beynəlxalq sularda naviqasiya azadlığı hüququna malikdirlər.

“Gəmidən gəmiyə neft daşınması və ya çirkləndirici maddələrin qanunsuz axıdılması ilə bağlı heç bir əlamət yoxdur, buna görə də Şri-Lanka hakimiyyətinin onlara qarşı tədbir görməsi üçün heç bir əsas yoxdur”, - deyə o bildirib.

Hakimiyyət orqanları bildirib ki, ABŞ sanksiyalarından sonra bir çox İran ticarət gəmisi Malakka boğazı və Sinqapur istiqamətində şərqə doğru hərəkət edib, bir neçəsi isə Şri-Lanka sularının yaxınlığında qalıb.

Şri-Lanka rəsmiləri bildiriblər ki, Vaşinqton sanksiya tətbiq edilən İran bayrağı altında üzən gəmilər barədə Kolomboya rəsmi olaraq məlumat verməyib.


Reportyor.az 



KARUSEL / DÜNYA