Yunanıstanda tələbələr, müəllimlər və dövlət qulluqçuları çərşənbə günü yüksək yaşayış xərclərinə qarşı etiraz etmək üçün küçələrə çıxacaqlar. Onlar bildirirlər ki, Fransa həftəsonu şiddətli nümayişlərə səbəb olan problemlərlə eyni çətinliklərlə üzləşiblər.

Aksiyaların günorta saatlarında Afina və ölkənin ikinci ən böyük şəhəri olan Salonikidə keçirilməsi gözlənilir.

Saloniki Aristotel Universitetində tələbə birliyinin rəhbəri Katia Kubusidu AFP agentliyinə bildirib: "Fransada olduğu kimi, Yunanıstanda da biz dövlət tərəfindən maliyyələşdirilən, pulsuz təhsil tələb edirik".

"Bu, bir dəfəlik etiraz aksiyası olmayacaq. Biz nümayişlərimizi davam etdirməyi planlaşdırırıq".

Çərşənbə axşamı onlarla tələbə Afinada parlament binasının qarşısındakı Sintaqma meydanında, Salonikidə isə piyadalar üçün nəzərdə tutulmuş küçədə çadırlar qurublar.

Dövlət qulluqçuları həmkarlar ittifaqı da işi dayandırmağa və Afinada toplaşmağa çağırış edib.

Orta məktəb şagirdləri və müəllimlər infrastruktur çatışmazlığına, kadr qıtlığına və təhsil sahəsində dövlət xərclərinin artırılması zərurətinə etiraz edirlər.

Yunanıstanın mühafizəkar hökuməti son günlər ölkədəki vəziyyəti Fransadakı etirazlar və zorakılıq halları ilə müqayisə etməkdən yayınmağa çalışıb.

Baş nazir Kiriakos Miçotakis bazar ertəsi bəyan edib ki, ölkə heç vaxt on ildən çox əvvəl maliyyə böhranı dövründə müşahidə olunan, əhali tərəfindən bəyənilməyən sərt qənaət tədbirləri ilə yadda qalan "böyük sosial iğtişaşlar dövrünə" qayıtmayacaq.

Şənbə günü Fransa şəhərləri son illərin ən şiddətli iğtişaşlarından birinə şahid olub: dövlət binaları yandırılıb, yüzlərlə mağaza talan edilib və 2000-dən çox insan həbs olunub.

Reportyor.az 



KARUSEL / DÜNYA