Serbiya Daxili İşlər Nazirliyinin rəhbəri İvitsa Daçiç bildirib ki, çərşənbə günü Belqradda, İsrail səfirliyinin qarşısında bir polis əməkdaşına qarşı törədilən "terror hücumu"ndan sonra polis hücumçunu öldürüb.

"Hələlik kimliyi müəyyən edilməmiş bir yeniyetmə... 'Allahu Əkbər' qışqıraraq iki bıçaqla polis əməkdaşına hücum etdi", - deyən Daçiç, eyni zamanda terror təhlükəsi səviyyəsinin ən yüksək həddə qaldırıldığını açıqlayıb.

Daxili İşlər Nazirliyinin bəyanatında qeyd olunur ki, çərşənbə günü gecə yarısından dərhal sonra baş verən hadisə zamanı polis əməkdaşı özünü müdafiə edərkən hücumçunu öldürüb, lakin özü üz nahiyəsindən yüngül bıçaq xəsarəti alıb.

Daçiç bildirib ki, təhlükəsizlik xidmətləri həmin şəxsi izləyirmiş; onun İŞİD tərəfdarı olduğu məlum imiş və ehtimal olunur ki, o, ölkənin qərbindəki Şabats şəhərindəndir.

"Onun 'Instagram' profilində qara bayraq və İŞİD-in emblemi var idi", - deyə o əlavə edib.

Daçiç terror təhlükəsi səviyyəsinin ən yüksək həddə – "qırmızı həyəcan" səviyyəsinə qaldırıldığını bildirib.

"Bu, təhlükəsizlik yoxlamalarının sərtləşdirilməsi, həmçinin infrastruktur obyektləri və insanların kütləvi toplaşdığı yerlər kimi həssas nöqtələrdə polis mövcudluğunun artırılması deməkdir", - deyə o qeyd edib.

Serbiyada bu cür hücumlar nadir hallarda baş versə də, Belqraddakı İsrail səfirliyi əvvəllər də hədəf alınıb.

2024-cü ilin iyun ayında arbaletlə silahlanmış bir şəxs səfirliyi mühafizə edən polis əməkdaşını ağır yaralayıb, daha sonra isə polis tərəfindən vurularaq öldürülüb.

Həmin vaxt müəyyən edilib ki, hücumçu Belqrad yaxınlığındakı kəndlərdən birindən olan 25 yaşlı bir kişi imiş; o, əvvəlcə İslamı qəbul edib, daha sonra isə ekstremist baxışlara yiyələnib.

Reportyor.az 



KARUSEL / DÜNYA