Mədəniyyət, Otellər və Turizm Nazirliyinin məlumatına görə, Myanma Çin (materik hissəsi), Hindistan, Yaponiya, Cənubi Koreya və Makaudan gələn səyahətçilər üçün nəzərdə tutulan "gəliş zamanı viza" (visa-on-arrival) proqramını daha bir il müddətinə uzadıb.

"The Star" qəzetinin xəbərinə görə, Çin və Hindistandan gələn turistlər üçün tətbiq edilən bu sistem artıq üçüncü ilinə qədəm qoyur və 30 avqust 2026-cı il tarixindən 29 avqust 2027-ci il tarixinədək qüvvədə olacaq.

"Global New Light of Myanmar" nəşrinin məlumatına əsasən, Yaponiya, Cənubi Koreya və Makaudan gələn qonaqlar üçün proqramın müddəti daha bir il – 21 oktyabr 2026-cı ildən 20 oktyabr 2027-ci ilədək uzadılıb.

Nazirliyin məlumatına görə, 2026-cı ilin ilk səkkiz ayı ərzində Myanmaya 700 mindən çox xarici qonaq gəlib ki, bu da əvvəlki illə müqayisədə 7% artım deməkdir.

Cənub-Şərqi Asiya ölkələri son vaxtlar turizmin inkişafını sürətləndirmək məqsədilə böyük iqtisadiyyata malik ölkələrdən gələn səyahətçilər üçün təşviqat kampaniyalarını gücləndirib və viza tələblərini sadələşdiriblər.

Malayziya və Tailand artıq Çin və Hindistan vətəndaşları üçün viza tələblərini ləğv edib, Sinqapur isə Çin vətəndaşlarına vizasız giriş imkanı təqdim edir.

Vyetnam da sahil kurort şəhəri Nyaçanqın (Nha Trang) yerləşdiyi Xanx Xoa (Khanh Hoa) əyalətinə səfər edən Çin vətəndaşları üçün sınaq xarakterli vizasız giriş proqramına başlayıb.

12 oktyabr 2026-cı il tarixindən qüvvəyə minən bu qaydaya əsasən, ən azı iki nəfərdən ibarət Çin vətəndaşları qrupları, müəyyən səyahət şərtlərinə riayət etməklə, 31 dekabr 2027-ci il tarixinədək ölkəyə vizasız səfər edə bilərlər.

Reportyor.az 



KARUSEL / DÜNYA