Baş nazir Binyamin Netanyahu seçki kampaniyasını bazar ertəsi günü belə bir xəbərdarlıqla yekunlaşdırdı ki, əgər seçkilərdə onun rəqibləri qalib gələrsə, İsrail İran tərəfindən mövcudluğuna qarşı potensial təhlükə ilə üzləşə bilər.

Netanyahu öz seçki kampaniyasını təhlükəsizlik sahəsindəki fəaliyyətinə əsaslandırıb və israr edir ki, ABŞ və İsrailin İrana qarşı apardığı müharibədə qarşıya qoyulan vəzifələri yerinə yetirməyə qadir olan yeganə lider odur.

Lakin keçmiş Baş Qərargah rəisi Qadi Ayzenkot Netanyahunu İran təhlükəsini öz siyasi maraqlarına uyğun gəldiyi məqamlarda şişirtməkdə, eyni zamanda müharibənin qarşıya qoyduğu məqsədlərə çata bilməməkdə ittiham edib.

Bazar ertəsi "Channel 14" telekanalına müsahibəsində Netanyahu deyib: "Düşünürəm ki, bu, dövlətimizin gələcəyi üçün həlledici məqamdır, çünki bizi məhv etmək istəyən düşmənlərimiz var". O əlavə edib: "Bu fanatik və ekstremist rejimi yer üzündən silməsək, gələcəyimizi təmin edə bilməyəcəyik".

O, sözünə davam edərək bildirib: "Qadi Ayzenkot İrana zərbə endirməyəcək".

Bu arada, ümumi seçkilərə bir gün qalmış – bazar ertəsi günü – İsrail müxalifəti birləşərək Netanyahunu səs qazanmaq naminə İranla təhlükəli oyun oynamaqda ittiham edib. Müdafiə naziri İsrael Kats bu iddiaları rədd edib.

Netanyahunun rəqiblərindən biri, keçmiş müdafiə naziri Aviqdor Liberman daha da irəli gedərək, baş nazirin "dövlətə xəyanət" ittihamı ilə araşdırılmasını tələb edib. O, Netanyahunun "seçkilərdə məğlub olmaq qorxusundan əsgərlərin həyatını qurban verməyə" hazır olduğunu iddia edib.


Reportyor.az 



KARUSEL / DÜNYA